Davlatimiz rahbarining joriy yil 27 yanvar kuni “Yoshlar uchun ish o‘rni yaratish va ularning bo‘sh vaqtini mazmunli tashkil etish” masalalariga bag‘ishlab o‘tkazgan videoselektor yig‘ilishida bergan topshiriqlariga asosan, Navoiy viloyatida viloyat hokimligi, Yoshlar ishlari agentligi viloyat boshqarmasi, Bandlik boshqarmasi, tijorat banklari bilan hamkorlikda amaliy ishlar boshlangan.

Xususan, Konimex tumanining olis cho‘l hududlaridan biri bo‘lgan “Sarjal” OFYdagi ishsiz 18 nafar yigit-qiz bandligini ta’minlash maqsadida 15 boshdan mayda shoxli mol berildi. Imtiyozli kredit asosida berilayotgan bu imkoniyat yoshlarning chorvachilik sohasidagi ilk qadamlari bo‘ldi.  

– Men “Sarjal” OFY qarashli “Teriquduq” ovulida yashayman, – deydi Yerjan Asanov. – Men ham bugun tengdoshlarim qatori naslli qo‘y oldim. Niyatim, o‘z chorvachilik faoliyatimni kengaytirib, yurtim ravnaqiga beminnat hissa qo‘shishdir.

Shuningdek, tuman hokimligi tomonidan konimexlik 16 nafar yoshni ish bilan band qilish, aholi dasturxoni to‘kinligini ta’minlash maqsadida 50 sotixdan 1 yil muddatga foydalanish uchun yer maydonlari ajratildi.

Yoshlarga joriy yilda amalga oshirilishi rejalashtirilgan bir qator loyihalar va tashabbuslar, yerdan samarali foydalanish to‘g‘risida ma’lumotlar berildi.