Navoiy viloyati Nurota tumanidagi Markaziy istirohat bog‘ida “Bo‘sh ish o‘rinlari mehnat yarmarkasi” o‘tkazildi.

Sektor rahbarlari ishtirok etgan tadbirda tumandagi korxona, tashkilotlar o‘zlaridagi mavjud bo‘sh ish o‘rinlari bilan ishtirok etdi.

Yarmarkaga tuman hududida yashovchi kam ta’minlangan oilalar, aholining ish bilan band bo‘lmagan qatlami, "Temir daftar"ga kiritilgan yoshlar, ayollar va ish qidiruvchi ishsiz fuqarolar jalb etildi.  

Tadbir yakunida 13 nafar ishsiz fuqaroga tuman Aholi bandligiga ko‘maklashish markazi tomonidan ishga joylashishi uchun yo‘llanmalar berildi.  

Shuningdek, Xotin-qizlarni qo‘llab-quvvatlash davlat maqsadli jamg‘armasi hisobidan subsidiya asosida “Ayollar daftari”ga kiritilgan 41 nafar xotin-qizga tikuv mashinasi va 103 nafariga elektr mini pechlari tarqatildi.