Yurtimizda aholi muammolarni hal etish va murojaatlarga ijobiy yechim topish borasida manzilli chora-tadbirlar amalga oshirilmoqda.

Bugun barcha tizim rahbarlari joylarga chiqib, aholi vakillari bilan uchrashmoqda. Ularning muammo va takliflarini o‘rganib, yechim izlamoqda. 

Navoiy viloyati Zarafshon shahriga yaqindagina tayinlangan hokim – Nazirbek Rahmonov “Konchilar” mahalla fuqarolar yig‘inida bo‘lib, aholi bilan uchrashdi. Zayniddin Haydarov taqdir taqazosi bilan nogironlik aravachasiga mixlangan. U ham murojaatiga ijobiy yechim topish maqsadida hokim qabuliga keldi. Uchrashuvda kutilmagan holatdan Zayniddin aka shoshib qoldi. Shahar hokimi unga peshvoz chiqib, xonaga kirishiga ko‘maklashdi. 

“Oltin vodiy” MFYda istiqomat qiluvchi Zayniddin Haydarov qabulda nafaqasini xonadoniga olib borishmayotganini bildirdi. Shu joyning o‘zida murojaat ijobiy yechim topib, mutasaddilarga ko‘rsatma berildi va hokimning o‘zi bu masalani doimiy nazoratga olishini ta’kidladi. Uchrashuvda ko‘zi ojiz tug‘ilgan qizining operatsiyasi uchun moddiy yordam so‘rab murojaat qilgan Gulmira Hasanovaning, ish izlab idorama-idora sarson bo‘lgan Shahnoza Norovaning ham muammolari ijobiy hal etildi.

“Konchilar” mahallasida qariyb besh soat davom etgan uchrashuvda turli masalalarda 30 ga yaqin murojaatlar tinglanib, ularga ijobiy yechim topildi.