Farg‘ona viloyati Dang‘ara tumanida viloyat hokimi Xayrullo Bozorovning navbatdagi sayyor qabuli o‘tkazildi.

Tegishli idoralar, tashkilot va muassasalar rahbarlari ishtirokida qariyb sakkiz soat davom etgan qabulda 200 nafardan ziyod fuqarolarning murojaatlari belgilangan tartibda ko‘rib chiqildi.

Fuqarolar tomonidan bandlik, tadbirkorlik faoliyatini yo‘lga qo‘yish, uy-joy, moddiy yordam olish, ta’lim kontraktini to‘lashga ko‘maklashish, bank krediti ajratish, yashash sharoitlarini yaxshilash, subsidiyalar ajratish, kadastr hujjatlarini rasmiylashtirish, ishga tiklash, sud qarori ijrosini ta’minlash, tibbiy xizmatlar, shu jumladan, murakkab jarrohlik amaliyotlari orqali yuqori texnologik tibbiy yordam ko‘rsatish kabi masalalarda qilingan murojaatlarning ko‘pi qabul chog‘ida o‘z yechimini topdi. Hal etilishi uchun muddat talab etiladigan murojaatlar bo‘yicha mutasaddilarga topshiriqlar berilib, ijrosi qat’iy nazoratga olindi. Shuningdek, sud va huquqni muhofaza qiluvchi idoralarga doir masalalar joyida soha mutasaddilariga yo‘naltirildi.