Sirdaryo viloyatining ko‘plab mahallalarida ayni kunlarda “Obod xonadon – obod ko‘cha – obod mahalla” mezonlarini joriy etish bo‘yicha keng ko‘lamli bunyodkorlik va obodonlashtirish ishlari olib borilmoqda.

Joylarda tashkil etilayotgan amaldagi ishlar bilan tanishish maqsadida Bosh vazir o‘rinbosari Zulayho Mahkamova Sardoba tumani Rovot mahallasiga tashrif buyurdi.  

Bosh vazir o‘rinbosari  mahallada “Obod xonadon” deb topilgan G‘ozibekov oilasida bo‘lib, xonadon bekasi, ikki qiz, besh o‘g‘il va kelinlarga bosh bo‘lib,  mahalla ayollariga bekalik va qaynonalik borasida o‘rnak ko‘rsatib, xotin-qizlarga milliy qadriyatlarimizni keng targ‘ib qilishda o‘zining katta hissasini qo‘shib kelayotgan “Oqila ayollar” harakati guruhi rahbari Irisoy aya bilan uchrashdi.  

–Bosh vazir o‘rinbosari Zulayho opaning biz qishloq ayollarini yo‘qlab kelgani ko‘nglimizni tog‘dek ko‘tardi, – deydi Irisoy aya. – Mahallamiz ayollari opa bilan bir piyola choy ustida dildan suhbat qurib, u kishidan mamlakatimiz xotin-qizlari turmushini yaxshilash uchun hukumatimiz tomonidan olib borilayotgan amaliy ishlar, rejalar haqida ko‘plab ma’lumotlar oldi.