Viloyat hokimi Shuhratbek Abdurahmonov Xonobod shahrida bo‘lib o‘tgan navbatdagi “Qurilish kuni” da viloyatimizdagi amalga oshirilayotgan bunyodkorlik va qurilish ob’ektlarining qurilish-montaj ishlari, sifati va muddati haqida shahar-tuman hokimlarining qurilish masalalari bo‘yicha o‘rinbosarlari, arxitektorlar, “Obod qishloq” dasturiga muvofiq qurilayotgan va ta’mirlanayotgan infratuzilma ob’ektlarining tadbirkorlari va barcha dasturlarga tushgan ijtimoiy soha ob’ektlaridan foydalanuvchi rahbarlar hamda tegishli korxona-tashkilot vakillari bilan uchrashdi.

Joriy yilda dasturlarga asosan aholi uchun 224 ta 2 sotixli 3 xonadon iborat arzon uy-joylar hamda 49 ta ko‘p qavatli ( har bir uyda 24 tadan xonadon jami 1176 ta) uylar qurilishi belgilangan. Viloyatimizdagi demografik jarayonning o‘zgarib borishi, ayniqsa aholining o‘sish ko‘rsatkichlari hamda viloyatdagi mavjud er maydonini hisobga olib, keyingi yilllarda ko‘p qavatli uylar ko‘payib boraveradi. 

Viloyat hokimi Shuhratbek Abdurahmonov barcha qurilish-montaj ishlari pudratchilarning har birlari bilan birma-bir suhbatlashib, qurilish ob’ektlarida amalga oshirilayotgan ishlarning sifatiga alohida e’tibor berish va o‘z muddatida yakunlashlari bo‘yicha topshiriq va ko‘rsatmalar berdi.