Qoraqalpogʻiston Respublikasi Ichki ishlar vazirligi tashabbusi bilan Qoraoʻzak tumani yoshlari Orol dengizi tubidagi suvi qurigan hududlarda “yashil qoplamalar” – himoya oʻrmonzorlari yaratishda ishtirok etayotgan hasharchilarga koʻmakka bordi.

Yoshlar tumanning eng chekka “Aqpetkey“ deb nomlangan hududida Qashqadaryo va Surxondaryo viloyatlaridan kelgan hasharchilar bilan uchrashdi.

Tadbirda Qoraqalpogʻiston Respublikasi Ichki ishlar vaziri A. Temirxanov, Qoraqalpogʻiston Respublikasi davlat oʻrmon xoʻjaligi qoʻmitasi raisi U. Utambetov, Oʻzbekiston yoshlar ittifoqi Qoraqalpogʻiston Respublikasi Kengashi raisi A. Daniyarov davlatimiz rahbari tashabbusi bilan Orolboʻyini, shu jumladan Moʻynoq tumanini ijtimoiy-iqtisodiy rivojlantirish, hududda ekologik holatni barqarorlashtirish, Orol dengizining qurigan hududlarida “yashil qoplamalar” – himoya oʻrmonzorlari barpo etish borasida amalga oshirilayotgan keng koʻlamli ishlar boʻyicha maʼlumot berdi.

Tuman yoshlari saksovul ekish va urugʻini yigʻish ishlarida faol ishtirok etdi. Shuningdek, hasharchilar Qoraqalpogʻiston Respublikasi Ichki ishlar vazirligining tibbiyot boʻlimi shifokorlari tomonidan tibbiy koʻrikdan oʻtkazildi.

Tadbir yakunida ishtirokchilarga Qoraqalpogʻiston Respublikasi Ichki ishlar vazirligining “Orol yulduzlari” ansambli hamda Qoraoʻzak tumani madaniyat boʻlimi xodimlarining konsert dasturi namoyish etildi.