O‘zbekiston Qurolli Kuchlari akademiyasida “Vatanparvarlik – milliy yuksalish kafolati“ shiori ostida “Prokuror va yoshlar uchrashuvi“ tashkil etildi.

Unda Toshkent shahar harbiy prokuraturasi vakillari, kursantlar, O‘zbekiston yoshlar ittifoqi faollari ishtirok etdi.

Tadbirda Qurolli Kuchlar akademiyasi bo‘ylab ekskursiya uyushtirilib, unda akademiya faoliyati, mashg‘ulot xonalarida tashkil etilgan zamonaviy pedagogik ta’lim tizimi, modellashtirish va simulyatsiya, axborot-kommunikatsiya texnologiyalari, kursantlarning yashash sharoitlari haqida ma’lumot berildi.

Uchrashuvda kursantlardan tashkil topgan faxriy qorovul vzvodining qurol hamda qo‘l jangi namoyishi, orkestr tomonidan ijro etilgan kuy-qo‘shiqlar, ko‘rgazmali chiqishlar ishtirokchilarda yaxshi taassurot qoldirdi.

Tadbir doirasida ishtirokchilar Qurolli Kuchlar akademiyasi tarixi muzeyiga sayohat qildi. Toshkent oliy umumqo‘shin qo‘mondonlik bilim yurti (hozirda Qurolli Kuchlar akademiyasi) 1918-yil 12-iyulda tashkil topgan. 1941-1945 yillarda fashizmga qarshi olib borilgan urush davrida bilim yurtida 25 ta bitiruv o‘tkazilib, 8 mingdan ortiq ofitserlar tayyorlangan.

Prezidentimizning 2017-yil 25-apreldagi tegishli qaroriga muvofiq, Toshkent oliy umumqo‘shin qo‘mondonlik bilim yurti negizida yangi Qurolli Kuchlar akademiyasi tashkil etilgan.

Uchrashuvda ishtirokchi yoshlarga bugungi kundagi islohotlar, o‘zgarishlar, yaratilayotgan imkoniyatlar haqida ma’lumot berildi.