Sirdaryo viloyatining Sardoba tumani hokimi tashabbusi bilan “Har bir oila – tadbirkor” dasturi doirasida aholining kambagʻal qatlamini ushbu holatdan chiqarish maqsadida bir qator ishlar amalga oshirilmoqda.

Ana shu ezgu maqsad yoʻlida xayrli ish tumandagi Birlik mahalla fuqarolar yigʻinidan boshlandi. Bu yerda istiqomat qiluvchi aholining kambagʻal qatlamini moddiy qoʻllab-quvvatlash maqsadida taʼminotchi “FORISH SUNRISE FOODS” tomorqa xizmati masʼuliyati cheklangan jamiyati tomonidan kam taʼminlangan, ehtiyojmand va kambagʻallik darajasida yashayotgan oilalarning har biriga 1 sotixli issiqxonalar qurib berilmoqda.

– Maqsadimiz – kambagʻallik darajasida yashayotgan fuqarolarni ushbu holatdan doimiy daromad manbai bilan taʼminlagan holda chiqarishdan iborat, – deydi “FORISH SUNRISE FOODS” tomorqa xizmati MCHJ rahbari Elbek Sindarov. – Issiqxonadan yiliga 3-marta koʻchat ekib, 3-martagacha hosil olish imkoniyati bor. Masalan, bitta, 1 sotixli issiqxonaga 700 tup pomidor koʻchati ekib, har tup koʻchatdan oʻrtacha 4-5 kilogrammdan hosil olingan taqdirda, bugun bozorlarimizda pomidorning 1 kilosi oʻrtacha 3 ming soʻmdan hisoblaganimizda, birinchi hosilning oʻzidan 7-8 million soʻmdan ortiq daromad qilsa boʻladi.