Namangan tumanida aholini kambagʻallikdan chiqarish borasida amaliy ishlar davom ettirilmoqda.

Xususan, ushbu sektor hududidagi 13 ta MFYda 454 nafar ehtiyojmand oila roʻyxati shakllantirilib, ularga ish oʻrinlari yaratish boʻyicha olib borilgan chora-tadbirlar samarasida 529 nafar fuqaroning bandligi taʼminlandi.

Shuningdek, tuman prokurori tashabbusi bilan 429,2 milliard soʻm qiymatidagi, 1782 ta ish oʻrni vujudga keladigan 73 ta investitsion loyihalardan 20 tasi ishga tushirilib, 408 nafar kishining ishsizligiga barham berildi. Mazkur loyihalarni oʻz vaqtida amaliyotga kiritish, vujudga keltirilgan ish oʻrinlari haqqoniyligini muntazam kuzatib borish maqsadida elektron dastur joriy qilingan.

Ish beruvchilar bilan hamkorlikdagi saʼy-harakatlar natijasida esa 493 nafar yoshlar mehnat bozorida oʻz oʻrnini topishga erishdi.

Hududda 236 ta issiqxona qurilishi aholining moliyaviy ahvoli yaxshilanishiga zamin hozirladi. Shuningdek, sektor hududida tadbirkorlikni rivojlantirish, oilalarda barqaror ijtimoiy muhitni yaxshilash, ajrimlar sonini qisqartirish, agrar sohadagi faoliyat sifati va samaradorligini taʼminlash, kasanachilik yoʻnalishlarida ham namunali ishlar bajarilmoqda.