Самарқанд вилоят судида уч авлод учрашуви ташкил этилди. Тадбирда пенсиядаги фахрийлар, бугунги кунда фаолият кўрсатаётган судьялар ва ёш суд ходимлари иштирок этди.

Вилоят суди раиси О.Ҳайитов самарқандлик тўрт нафар пенсия ёшидаги судья ва суд ходимларига судьялар Олий кенгашининг "Ўзбекистон суд фахрийси" гувоҳномасини тантанали топширди ва устозларни юксак эътироф билан табриклади.

– 1976 йилда ўқишни тугатиб, Самарқанд туман судига ишга келганман. Шу билан роппа роса қирқ йил узлуксиз ишлаб, 2016 йилда пенсияга чиқдим, - деди суд фахрийси Шоиста Жалилова. – Биз ишлаган даврларда ҳозиргидек шароитлар бўлмаган. Бино эски, зах, қишда совуқ бўларди. Жиҳозлар ҳам, шароитлар ҳам ҳаминқадар эди. Бугун судьяларга бўлган эътиборнинг қадрига етиб, ҳар қанча фидойилик билан, садоқат билан ишласангизлар арзийди. Биз кексаларга берилган эътибор учун Президентимизга, Олий суд ва Судьялар олий кенгашига ҳамда вилоят суди раҳбариятига миннатдорчилик билдирамиз.

Тадбирда вилоят суди фахрийлар кенгаши раиси И.Саидов ва судьялар фахрийларни қутладилар. Ёш судьяларга бугунги эътиборга муносиб бўлиб фаолият кўрсатиш, ҳамиша адолат учун хизмат қилиш бўйича маслаҳат ва тавсиялар берилди.