Ўзбекистон Республикаси Президенти Администрацияси, Олий суд, Бош прокуратура, Ички ишлар вазирлигининг масъул ходимлари томонидан фуқароларнинг суд-ҳуқуқ соҳасидаги мурожаатларига самарали ечим топиш мақсадида оммавий қабул ўтказилди.

Унда Зарафшон шаҳри, Учқудуқ ва Томди туманлари, Навбаҳор туманининг “Кескантерак” маҳалласида Навбаҳор ва Нурота, Хатирчи туманлари, Кармана туманидаги “Офтобжон” болалар оромгоҳида Навоий ва Ғозғон шаҳарлари ҳамда Кармана тумани, Қизилтепа тумани “Ванғози” маҳалласида Қизилтепа ва Конимех туманлари фуқароларининг мурожаатлари тингланди.  

Олий суд раисининг ўринбосари Бахтиёр Исаков ва судьялар томонидан  уч кун давомида 347 нафар фуқаро қабул қилинди.  

– Қабулда вилоят судлари судьялари ҳам иштирок этди, – дейди вилоят суди раиси Ҳамидулла Қудратов. – Қилинган мурожаатларнинг 204 таси жиноят, 111 таси фуқаролик, 20 таси маъмурий, 12 таси иқтисодий ишлар бўйича судларга оид мурожаатларни ташкил этди. Уларнинг 320 таси оғзаки, 27 таси эса ёзма мурожаатлардир. Қабуллар жараёнида 347 та мурожаатдан 179 таси бўйича ҳуқуқий тушунтиришлар берилди, 141 та мурожаат жойида ижобий ҳал этилди, 27 та мурожаат бўйича аризалар Олий суд томонидан кассация тартибида ҳал қилиш учун қабул қилинди. 35 нафар шахс жазони ўташдан муддатидан илгари шартли равишда озод қилинди, 30 кишига нисбатан тайинланган озодликдан махрум қилиш ва озодликни чеклаш жазолари енгилроғи билан алмаштирилди, 66 нафар шахсга нисбатан ўташ учун тайинланган жазони умумий тартибли колониядан манзил колониясига ўтказилди. Шунингдек, 3 та жиноят ишлари тарафларнинг ярашганлиги муносабати билан тугатилган бўлса, 33 нафар шахсга нисбатан алимент ундириш юзасидан суд буйруғи чиқарилиб ижрога қаратилди. 

– Фуқаролар иш ҳақи, пенсия ва бошқа масалалар юзасидан мурожаат қилди, – дейди Навоий вилояти суди жамоатчилик ва ОАВлар билан алоқалар бўйича бош консультанти Азиза Рўзиева. – Жумладан, фуқаролик ишлари бўйича Учқудуқ туман суди томонидан 14 нафар фуқаро фойдасига қарийб 92 миллион сўм, фуқаролик ишлари бўйича Кармана туманлараро суди томонидан 35 нафар фуқарога қарийб 72,5 миллион сўм миқдорида иш ҳақини ундириш юзасидан суд буйруғи чиқарилди. Иқтисодий судлар томонидан 15 та иш суд мажлисларида кўрилиб, шундан тадбиркор (даъвогар)лар фойдасига жами қарийб 6 миллиард 163 миллион сўмлик даъво талаблари қаноатлантирилди.  

Ўзбекистон Республикаси судьялар Олий кенгаши раиси Холмўмин Ёдгоров томонидан суд-ҳуқуқ масалалари юзасидан 5 нафар фуқаро қабул қилиниб, тегишли тартибда ҳуқуқий тушунтириш берилди.