Давлатимиз раҳбари илгари сурган “халқ давлат идораларига эмас, давлат идоралари халққа хизмат қилиши керак”, деган тамойил ҳар бир давлат хизматчиси учун муҳим қоидага айланмоқда.

Эндиликда давлат хизмати самарадорлиги халқ эҳтиёжларини қондириш, инсон қадрини улуғлаш билан бевосита боғлиқ.  

Ўзбекистон Республикаси Президенти ҳузуридаги Давлат хизматини ривожлантириш агентлиги матбуот анжуманида шу ҳақда сўз юритилди.  

Тадбирда давлат фуқаролик хизматида ислоҳотлар амалга оширилиб, соҳани сифат жиҳатидан янги босқичга кўтаришга ҳаракат қилинаётгани қайд этилди.  

Давлат хизматини ривожлантириш агентлиги давлат фуқаролик хизмати трансформациясининг ғоявий платформасини, уни ривожлантириш дастурлари ва лойиҳаларини ишлаб чиқиб, давлат фуқаролик хизмати соҳасида ягона сиёсатни амалга оширади.  

Агентлик ташаббуси билан ташкил этилган Давлат фуқаролик хизматчилари вакант лавозимларининг ягона очиқ портали —  vacancy.argos.uz га 78 вазирлик ва идора ҳамда барча туман (шаҳар) ҳокимликлари уланган.  

Ташкилотлардаги мавжуд вакант лавозим бўйича 90 мингдан ортиқ танлов эълон қилинди. 919 минг номзод танловда иштирок этиш учун ҳужжат топширган. 2022 йилда 39 минг нафардан ортиқ шахс давлат фуқаролик хизматига қабул қилинди.  

Ўтган йилда агентлик томонидан жами 68 минг 788 нафар давлат фуқаролик хизматчиларининг малакасини ошириш бўйича 90 дан зиёд ўқув курслари ташкил этилди. Янги тартиб асосида 832 та сектор раҳбарлари фаолиятининг самарадорлиги (KPI) еттита  йўналишда баҳоланиши йўлга қўйилди.  

2022 йилда 15 та давлат фуқаролик хизматига оид ижтимоий тадқиқотлар ўтказилган бўлиб, уларда 190 минг нафардан ортиқ респондент қамраб олинган.  

Давлат хизматчиларининг ҳуқуқларини ҳимоя қилиш ва улар учун яратилган шарт-шароитлар юзасидан бешта комплекс ўрганишлар ва мингдан зиёд мониторинглар ўтказилди. Аниқланган қонунбузилиш ҳолатлари бўйича киритилган таъсир чоралари натижасида 358 нафар ходимнинг меҳнатига ҳақ тўлашга оид бузилган ҳуқуқлари тикланди. 67 ноқонуний буйруқ бекор қилинди. 55 нафар айбдорга нисбатан интизомий жазо чораси қўлланилган, 6 нафар ходим лавозимидан озод этилган, 3 нафар айбдорга нисбатан маъмурий жарима қўлланилган.  

“Давлат фуқаролик хизмати соҳасида инсон ресурсларини бошқариш” (hrm.argos.uz) ахборот тизими ишлаб чиқилди. Ҳозирда тизимга 4 мингга яқин ташкилот уланган.  

Давлатимиз раҳбарининг “Келажак лидерлари”ни шакллантириш ташаббусини амалда жорий этиш мақсадида 6 минг 246 нафар иқтидорли ёшлар орасида ўтказилган 4-босқичли танлов натижаларига кўра, 630 нафар энг муносиб ёшлардан иборат “Келажак лидерлари” клублари ташкил этилди.  

Раҳбар кадрлар захирасини яратишга кўмаклашиш мақсадида агентлик ташаббуси билан “Келажак лидерлари” дастурлари амалга оширилди. Дастур доирасида 7 минг нафардан ортиқ 30 ёшдан ошмаган қобилиятли ёшлар орасидан 50 нафар энг муносиби танлаб олиниб, махсус дастур асосида раҳбарликка тайёрланди.