Қабулда суд қарорлари ва ажримларидан норози бўлган, турли ижтимоий-иқтисодий масалаларда ҳуқуқий маслаҳат ва кўмак сўраб келган фуқароларнинг мурожаатлари тингланди.

Кеча Хоразм вилоятининг Хазорасп ва Шовот туманларида Ўзбекистон Республикаси Олий суди раиси ўринбосари Б.Исаков ва Олий суд судьялари, шунингдек, Хоразм вилояти жиноят, маъмурий, фуқаролик ва иқтисодий ишлар бўйича суд раислари Ўзбекистон Республикаси Президентининг Халқ қабулхоналари бўлимлари билан ҳамкорликда фуқароларнинг тизимга дахлдор мурожаатлари юзасидан сайёр қабул ўтказди.

Қабулда суд қарорлари ва ажримларидан норози бўлган, турли ижтимоий-иқтисодий масалаларда ҳуқуқий маслаҳат ва кўмак сўраб келган фуқароларнинг мурожаатлари тингланди. Ҳар бир мурожаат атрофлича ўрганилиб, уларнинг ечимлари қонун талаблари асосида ҳал қилинди.

Сайёр қабулда 124 нафар фуқароларнинг мурожаатлари тингланиб, шундан 29таси жиноят ишлари бўйича, 16таси маъмурий ишлар бўйича, 73таси фуқаролик ишлари бўйича ва 6таси иқтисодий судга тааллуқли масалалар юзасидан келиб тушди. Шундан 25та шикоят назорат тартибидаги ўрганиш учун қабул қилиниб, 99та мурожаат юзасидан фуқароларга уларнинг мавжуд ҳуқуқлари юзасидан тушунтиришлар берилди.

Қабул давомида халқимизга хос бўлган инсонпарварлик тамойиллари асосида жиноят ишлари бўйича судлар томонидан биринчи инстанция судларида бир нафар ва апелляция инстанциясида бир нафар судланувчи суд залида қамоқдан озод қилиниб, оиласи бағрига қайтарилди.

Бундан ташқари, ўтказилган сайёр қабул давомида Олий суд раиси ўринбосари Б.Исаков томонидан халқ билан очиқ мулоқотлар ўтказилиб, йиғилишда суд-ҳуқуқ соҳасида фуқароларнинг ҳуқуқлари ва эркинликларини янада изчил ҳамда самарали муҳофаза қилиш юзасидан тушунтириш берилди.

Шуни таъкидлаш жоизки, жиноят ишлари бўйича Хоразм вилоят суди томонидан 2019 йилнинг I чорагида 4 нафар шахсга нисбатан оқлов ҳукмлари чиқарилиб, 15 нафар шахс суд залида қамоқдан озод этилган.

ЎзА