Бойсун туманида “Бойсун барака чеварлари” корхонаси фойдаланишга топширилди.

Тикув-трикотаж маҳсулотлари ишлаб чиқаришга мўлжалланган янги корхонанинг тантанали очилиш маросимида вилоят ва туман ҳокимлиги, давлат ва жамоат ташкилотлари вакиллари, нуронийлар, хотин-қизлар ва ёшлар вакиллари иштирок этди.

Тадбирда кейинги йилларда мамлакатимизда хотин-қизларнинг бандлик масаласини ҳал этишга қаратилаётган эътибор аҳоли зич яшайдиган, меҳнат ресурслари кўп ҳудудларда қишлоқ аёлларини иш билан таъминлашда юксак самаралар бераётгани таъкидланди.

Президентимиз томонидан илгари сурилган бешта муҳим ташаббус бу борадаги ишларни янги босқичда ривожлантиришда муҳим омил бўлмоқда.

Енгил конструкцияли қурилиш материаллари асосида бир ойда қуриб битказилган корхона ишга туширилиши билан 150 нафар хотин-қизнинг бандлик масаласи ҳал этилди. Хитой, Туркия ва Японияда ишлаб чиқарилган энг замонавий тикув дастгоҳлари билан жиҳозланган замонавий мажмуада кийиниш, ювиниш, дам олиш, тиббиёт хоналари, ошхона ва бошқа ёрдамчи хоналар барпо этилган. Тоғли туманда янги корхонани қуриб, жиҳозлаш учун 1 миллиард 700 миллион сўмга яқин маблағ сарфланди.

Келгусида бу ерда яна 150 хотин-қизнинг бандлиги таъминланиб, ишлаб чиқарилган тайёр маҳсулотнинг бир қисмини хорижга экспорт қилиш мўлжалланмоқда.

Тадбирда Сурхондарё вилояти ҳокими Т.Боболов сўзга чиқди.