Фарғона вилояти Бағдод туманида “Аёллар дафтари”га 2 минг 527 нафар хотин-қиз киритилган.

Айни кунларда уларни ҳар томонлама қўллаб-қувватлаш, бандлигини таъминлаш ва қўшимча даромад манбаларини яратиб бериш чоралари кўрилмоқда.

Наврўз байрами арафасида боқувчисини йўқотган, ногиронлиги бўлган ва кам таъминлангани сабабли рўйхатга олинган 30 нафар фуқарога тикув машиналари, яна 10 нафарига икки бошдан қўй берилди.

“Самарқанд” маҳалла фуқаролар йиғинида яшовчи Маҳбубахон Йўлдашева бичиш-тикишнинг ҳадисини олган, аммо шу кунгача рўзғоридан орттириб тикув машинасини харид қила олмаётган эди. Унга субсидия маблағлари ҳисобидан замонавий тикув машинаси топширилди.

– Байрамда яхши совға бўлди, – дейди қувонч билан М.Йўлдашева. – Анчадан бери оиламизга қўшимча даромад келтиришни мақсад қилиб юргандим. Мана, бугун бу ниятим амалга ошди. Энди янги тикув машинасидан самарали фойдаланиб, рўзғоримни бутлайман.

Март ойининг ўзида туманда 49 нафар аёлга замонавий тикув машинаси ва 21 нафар аёлга икки бошдан қўй берилди, 56 хотин-қизнинг эса бандлиги таъминланди.