Самарқанд вилояти ҳокими Э.Турдимов вилоят бошқарма ва идоралари, туман ва шаҳарлар ҳокимликлари масъуллари иштирокида аҳоли мурожаатларини ўрганиш масаласини муҳокама қилди.

Маълумотларга кўра, бугунги кунга келиб вилоят бўйича мурожаатларнинг сони 76 мингга яқинни ташкил этмоқда. Улардан 38 минг тасининг ижросини таъминлаш борасидаги ишлар ўз вақтида бажарилмаган.  Вилоят ҳокими мутассадилардан бунинг сабабини сўради.

Шунингдек, давлат идоралари вакилларининг аҳоли билан бевосита учрашувлари ҳам барча жойда бирдек ташкил этилмаётгани қайд этилди. Жумладан, Каттақўрғон шаҳри, Ургут, Нуробод, Каттақўрғон туманларида  раҳбарларнинг фуқаролар учун сайёр қабуллари кам ташкил қилинган.  

Видеоселектор тарзида ўтказилган муҳокама жараёнида вилоят ҳокими билан учрашишни сўраган, унга дардини айтмоқчи бўлган фуқаролар ҳам иштирок этди. Улар туман ва шаҳарлардаги студиялар орқали вилоят ҳокимига ўз муаммолари юзасидан мурожаат қилди.  

Нарпайлик фуқаро тумандаги Нарпай туманидаги Мирбозор бозоридан жой олишда ёрдам сўраб, вилоят ҳокимининг телеграм мессенжерига ва бошқа масъулларга мурожаат қилган. Унинг мурожаатига кўра, фуқарога бозор ҳудудидан жой ажратиб берилган, аммо у бундан норози бўлиб, бозор марказидан жой сўраган.

Ушбу мурожаатни ўз вақтида ҳал этмаган маъсул шахслар эгаллаб турган вазифасидан озод этилди.

Пастдарғомлик Лола исмли фуқаро катта ҳовлида ёлғиз яшайди. У уй-жойини таъмирлаш учун вилоят ҳокимидан ёрдам сўраган. Ушбу мурожаат асосида вилоят касаба уюшмалари ташкилотлари томонидан қурилиш материаллари етказиб берилган. Энди Лола опа ҳашар йўли билан уйини таъмирлаб беришларини сўрамоқда.

Маълум бўлишича, бу хонадоннинг томорқа ери ҳам мавжуд, аммо ундан фойдаланилмаяпти. Вилоят ҳокими фуқарога томорқани обод қилиб, ундан фойдаланишни тавсия қилди.

– Сиз ўзингиз ва бошқа қариндош-уруғингиз билан томорқани тартибга келтириб, уни обод қилиб қўйинг, ундан даромад олишни ўрганинг, кейин биз сизга уй-жойингизна таъмирлашга ёрдам берамиз, – деди Э.Турдимов. – Умуман, ҳар бир фуқаро аввало мавжуд имкониятдан самарали фойдаланиши керак, яъни яхши яшаш учун томорқаси, қўлидаги касб-ҳунари орқали даромад топишни ўрганиши керак. Сендан ҳаракат, мендан баракат, деган гап бекор айтилмаган.  

Иш жойи ва даромад манбаига эга бўлмагани учун ёрдам сўраган тойлоқлик аёлнинг ҳам ҳовлисида субсидия асосида иссихона қуриб бериладиган бўлди.  

Учрашувда ишга жойлаштириш, болалар майдончаси, ички йўлларни таъмирлагш билан боғлиқ мурожаатларга ҳам шу ернинг ўзида ечим топилди.  

Аҳоли мурожаатларига эътиборсиз қараган масъул мансабдор шахсларга нисбатан, белгиланган интизомий чоралар кўрилди.