Сирдарё вилоятининг 2-сектор ҳудуди ҳисобланган Сайхунобод туманининг оғир шароитдаги “Нурли йўл” ва “Янги ҳаёт” маҳаллаларида ободонлаштириш ишлари жадал суратларда олиб борилмоқда.

Сирдарё вилояти прокурори Шохрух Аминов ушбу ҳудудларда бўлиб, олиб борилаётган ишлар ҳолатини ўрганди.

Жумладан, ушбу маҳаллаларда 34,7 км ички йўллар, 6,7 км ичимлик суви тармоқлари, 11 км электр тармоқлари, 6 та трансформатор пункти, 8 км пиёдалар йўлагини қуриш, 200 дона тунги ёритиш чироқлари, 4 та якка тартибдаги уйлар, 1 та мактабгача таълим муассасасини мукаммал ва жорий таъмирлаш режалаштирилган.

Қисқа фурсатда, 3,4 км ички йўллар, 1 та трансформатор пункти, 4 та якка тартибдаги уйлар таъмирланди, 60 та симёғоч янгисига алмаштирилиб, 3,3 км. масофага электр узатиш тармоқлари тортилди.

Сектор раҳбарлари томонидан оғир шароитдаги ҳудудларни ободонлаштириш, ижтимоий-иқтисодий инфратузилмани, тадбиркорлик муҳитини яхшилаш бўйича амалга ошириладиган ишлар юзасидан тасдиқланган “Йўл харитаси”га мувофиқ ишлар давом эттирилмоқда.