Самарқанд вилояти Ургут туманида Марказий ҳарбий округ қўшинлари қўмондони полковник Ойбек Саидов ҳамда туман ёшларининг учрашуви ўтказилди.

Ёшлар ойлиги доирасида ташкил этилган тадбирда дастлаб қўмондон Қуролли Кучларимиз ташкил топишининг ҳуқуқий асослари, тузилиши ва таркиби, армияни шакллантиришда босиб ўтилган машаққатли йўл ҳақида гапириб берди. 

Шунингдек, миллий армиямиздаги ислоҳотлар, мамлакатимиз мудофаа салоҳияти, ҳарбий хизматчиларнинг Халқаро армия ўйинларида эришган натижалари тўғрисида батафсил маълумот берилди.

Ургутлик ёшлар ҳарбий бўлиш ва бунинг ўзига хос талаблари, қўмондоннинг ҳаёт йўли ва фаолияти билан қизиқди. Бу борадаги кўплаб саволларга О.Саидовдан жавоблар олди. Тадбир якунида қўмондон бир гуруҳ ёшларга бадиий адабиётлар тўплами, спорт анжомлари ҳамда эсдалик совғаларини топширди. 

Самарқанд гарнизонидаги ҳарбий қисм ҳарбий хизматчилари томонидан намойиш этилган ҳарбий-техника ва қурол-аслаҳалар кўргазмаси ҳамда ҳарбий оркестр жамоаси томонидан намойиш этилган концерт дастури ёшларга кўтаринки кайфият бағишлади.