Маълумки, Президентимиз ташаббуси билан маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича ҳоким ёрдамчиси фаолияти йўлга қўйилган.

Ўтган қисқа вақт мобайнида ҳоким ёрдамчилари томонидан турли соҳалар кесимида салмоқли ишлар амалга оширилди. Буни Янги Наманган тумани “Меҳнатобод” маҳалла фуқаролар йиғинида фаолият юритаётган ҳоким ёрдамчиси Комилжон Умаровнинг саъй-ҳаракатлари самарасида ҳам кўриш мумкин.

Айниқса, ҳоким ёрдамчисининг ҳудудда тадбиркорликни ривожлантириш борасида амалга оширган ишлари эътиборга молик.

Ушбу маҳаллада истиқомат қилувчи Тоҳиржон Билолов ҳоким ёрдамчиси кўмаги билан имтиёзли кредит олиб, эчкичиликни йўлга қўйди. Бундан ташқари у хонадонида манзарали қушлар, кабутар, товуқ ва курка парваришламоқда.

Маҳалла фуқароларидан яна бири Ҳамидулла Убайдуллаев “Убайдуллаев Ҳамидулла Муйдинович” оилавий корхонасини ташкил этиб, оила аъзолари билан қандолатчилик маҳсулотлари ишлаб чиқаришни йўлга қўйди. Айни пайтда 8 киши меҳнат қилаётган ушбу корхонада кунига 250 килограммгача шоколад тайёрланиб, ички бозорга етказиб берилмоқда.

Шарифахон Мираҳмедовага эса ҳоким ёрдамчиси саъй-ҳаракати билан тикув машинаси тақдим этилди. Ҳозирда у 5 нафар шогирди билан буюртма асосида турли либослар тикмоқда. Шунингдек, тадбиркор кооперация асосида 15 нафар аёлни иш билан таъминлаган.