Термиз шаҳрига янги тайинланган ҳоким Ўктам Тўраев илк учрашувини ёшлар билан ўтказди. “Чегара” маҳалласида бўлиб ўтган учрашувда секторлар, мутасадди ташкилот раҳбарлари ҳамда 1-сектордаги “Боғзор”, “Мангузар”, “Чегара” ва “Меҳробод” маҳалла фуқаролар йиғини ёшлари иштирок этди.

Дастлаб, Ёшлар ишлари агентлиги Термиз шаҳар бўлими томонидан жорий йилнинг 9 ойи мобайнида амалга оширилган ишлар бўйича тақдимот қилинди. 

Очиқ мулоқот кўринишида ўтказилган учрашувда ёшларнинг муаммолари тингланиб, аксарияти жойида ҳал этилди. Хусусан, ишга жойлашиш, “Ёшлар дафтари”да рўйхатда турувчи ёш оила фарзандларига соғлигини тиклаш ва жарроҳлик харажатларини тўлаб бериш, талабаларнинг шартнома тўлови каби масалалардаги мурожаатларига белгиланган тартибда амалий ёрдам кўрсатиладиган бўлди.

Шунингдек, бажарилиши муддат талаб этадиган мурожаатларни ижобий ҳал этиш бўйича мутасаддиларга тегишли топшириқ берилиб, ижроси қатъий назоратга олинди.