Халқ билан доимий мулоқот, хонадонма-хонадон ўрганишлар, муаммолар ечимига интилиш, маҳаллаларни қамраб олаётган бунёдкорлик ҳаракати, оилавий тадбиркорлик равнақи учун шароит яратиш, кенгликлардан уфқларга туташаётган халқ сайллари, мингйиллик қадриятлар тараннуми бугун сирдарёликларнинг ҳаёт манзараларида ҳам намоён бўляпти.

Хусусан, Республика ишчи гуруҳининг “Оққўрғон тажрибаси” асосидаги фаолияти Президент Халқ қабулхоналари, секторлар ва маҳалла тизимларининг янада уйғун, самарали ишлашини йўлга қўйиш, дастурлар ижроси ва тизимли масалалар ҳал қилинишини жадаллаштиришда яна бир муҳим платформа бўлди.

Вилоятдаги 112 та маҳаллада дастурлар асосида бунёдкорлик ишлари олиб бориляпти. Деярли ҳар икки-уч маҳалладан биттасида йўллар таъмири, ичимлик суви ёки электр энергияси таъминоти билан боғлиқ тизимли масалалар ҳал қилиняпти. Жумладан, жами 13,4 км йўл таъмирланди. Шундан, 8,7 км йўлга асфальт ётқизилди, 2,7 км бетонлаштирилди, 2 км шағаллаштирилди. Электр таъминоти масаласида 61 та темир-бетон таянчлар, 6 та трансформатор ўрнатилди, 2,8 км янги тармоқ тортилди.

Ичимлик сувини яхшилаш борасида 16,6 км ичимлик суви тармоғи тортилди, 2 дона қудуқ ва 5 дона сув минораси қурилиш ишлари бажарилди. Айтайлик, Сирдарё тумани марказидан 20 км. олисдаги Шоликор маҳалласи аҳлининг ҳам ичимлик суви билан боғлиқ кўп йиллик муаммосига бу йил ниҳоят ечим топилди. Дастурлар асосида 11,7 км. тармоқ тортилаётгани билан 400 та хонадон ичимлик суви билан барқарор таъминланади. Ёки Сайхунободнинг Олғабос маҳалласи аҳолиси мурожаатлари асосида 180 метрдан чучук сув чиқариляпти, 2,6 км. қувур билан эса 70 та хонадонга оби ҳаёт кириб боради.

“Оққўрғон тажрибаси” асосидаги фаолиятдан кўзланган яна бир мақсад – аҳолининг дастурхони тўкинлиги-ю рўзғори бутлигини таъминлашдан иборат. Шу мақсадда 541 нафар жисмоний ва юридик шахсларга 13 млрд. сўм кредит ажратилди. Шундан, оилавий тадбиркорлик дастурлари доирасида 195 нафар фуқарога 4,1 млрд. сўм имтиёзли кредит ажратилди. Жумладан, Янгиер шаҳри Бобур маҳалласида яшовчи Жамшид Ҳамроқулов хонадонидаги ўрганишлардан сўнг унга уйида балиқчилик билан шуғуланиши учун 30 миллион сўм кредит ажратилди.

Юксалиш маҳалласида яшовчи Баҳриддин Данишев эса 300 миллион сўм имтиёзли кредит эвазига хонадонида сут маҳсулотларини қайта ишлашни йўлга қўйди. Бинокор маҳалласи аҳолиси тиббий кўрикдан ўтиш учун аввал Янгиер шаҳри марказига борган бўлса, энди ўрганишлар асосида маҳалланинг ўзида контейнер қўйилиб, тиббиёт пункти ташкил қилинди.