Сирдарё вилояти ҳокими Акмалжон Маҳмудалиев Тошкент кимё-технология институти Янгиер филиали талабалари билан учрашди.

Очиқ ва самимий руҳда кечган мулоқотда вилоят ҳокими ўз тажрибасидан келиб чиқиб, талабаларга олий ўқув юртида эгаллаган билимларини келгусидаги касбий фаолиятда тўғри қўллаш бўйича муҳим тавсия ва маслаҳатларини берди.

Йигит-қизларнинг фикр-мулоҳазалари, истак ва келажак режалари эшитилиб, барча таклиф ва ташаббуслари қўллаб-қувватланди. Вилоят ҳокими ҳар чоракда бир маротаба юқори босқич талабаларига дарс ўтадиган бўлди.

– Вилоят раҳбарининг талабаларга сабоқ бериши нафақат ёшлар, балки биз ўқитувчиларни ҳам руҳлантиради, – дейди ТКТИ Янгиер филиали директори, профессор Зафар Ҳакимов.  

Мазкур учрашув доирасида талабаларнинг ижодий ишлари кўргазмаси, илмий-техникавий ишланмалар тақдимоти, “Заковат” интеллектуал ўйини ва спорт мусобақалари ташкил қилинди.  

Фаол талабаларга Тошкент шаҳрига саёҳат йўлланмаси, ташаккурнома ва китоблар топширилди. Шунингдек, ҳоким филиал қошида очилган “Ёшлар саноат технопарки” фаолияти билан ҳам танишди.