Жиззах вилояти ҳокими Эргаш Салиевнинг навбатдаги оммавий сайёр қабули Пахтакор туманининг “Боғишамол” маҳалла фуқаролар йиғинида ўтказилди.

Оммавий қабулда секторлар раҳбарлари, вилоят ҳокимининг ўринбосарлари, аҳоли муаммоларини ҳал этиш бўйича ишчи гуруҳ аъзолари, ҳоким ёрдамчилари, маҳалла раислари ва вилоят ҳамда тумандаги ташкилот ва муассасалар раҳбарлари иштирок этди.

Қабулда бошқа ҳудудлардаги аҳолига қулайлик яратиш мақсадида шаҳар ва туманлардаги Халқ қабулхоналаридан онлайн тарзда вилоят ҳокимига мурожаат қилиш имконияти яратилди.

Қабулда ҳар бир гуруҳдаги мутасаддилар аҳоли муаммоларини тинглади.

Пахтакор туманида 2023 йилда 6 та давлат дастури доирасида 62 та объектда 68 миллиард сўмлик қурилиш-таъмирлаш ишлари бажарилди. Туманда жорий йилда тасдиқланган 3 та давлат дастури доирасида 21 та объектга 22 миллиард 600 миллион сўм маблағ ажратилган.

“Ташаббусли бюджет” дастурининг иккинчи мавсумида ғолиб бўлган 6 та объектга 8 миллиард 100 миллион сўм маблағ йўналтирилди.

Сайёр қабулда аҳоли томонидан даволаниш ва дори-дармон, уй-жой таъмири ва ижтимоий масалаларга доир мурожаатлар келиб тушди. 71 нафар фуқародан 92 та масалада мурожаатлар қабул қилинди.

Ушбу мурожаатларни қонун доирасида белгиланган муддатларда ўрганиб, ижобий ҳал этиш бўйича вилоят ҳокимининг ўринбосарлари, вилоят ташкилотлари раҳбарлари ҳамда туманлар ҳокимларига вазифалар белгилаб берилди.