Buxoro viloyati hokimi vazifasini bajaruvchi Botir Zaripov Qorako‘l tumanida ommaviy sayyor qabul o‘tkazdi. Unda qorako‘lliklardan tashqari, Olot, G‘ijduvon, Jondor tumanlari va Buxoro shahridan ham fuqarolarning muammolari tinglandi.

Sayyor qabulda fuqarolar tomonidan 362 ta murojaatni viloyatdagi 4 ta sektor, shuningdek, korxona, tashkilot, muassasalar rahbarlari, tuman hokimligi mutasaddilari eshitdi. Viloyat rahbari 67 nafar fuqaroning murojaatini tingladi.

 Murojaatlar asosan yo‘llarni ta’mirlash, toza ichimlik suvi ta’minotini yaxshilash, kommunal sohadagi kamchiliklarni bartaraf etish, uy-joy bilan ta’minlash, tibbiy xizmat ko‘rsatish sifatini yaxshilash, tadbirkorlikni rivojlantirish, tijorat banklaridan kredit olishda ko‘maklashish va ishga joylashish kabi muammolardan iborat bo‘ldi.

-- Sayyor uchrashuvda mahallamiz yo‘llari masalasida murojaat qildim, - deydi tumanning “Zarafshon” mahalla fuqarolar yig‘ini hududidagi “Qorako‘l” ko‘chasida yashovchi Gulnora Mallayeva. - Murojaat shu kunning o‘zida yechim topdi. Ko‘chamizda boshlang‘ich ta’mirlash ishlari boshlab yuborildi. 

Joyida hal etish imkoni bo‘lgan murojaatlar yuzasidan talablar qanoatlantirildi. Atroflicha o‘rganishni taqozo etadigan dolzarb masalalarni hal etish yuzasidan mutasaddilarga topshiriqlar berildi. 

Viloyat rahbari fuqarolarning murojaatlari e’tiborsiz qolmasligi, ularning barcha savollariga rahbarlar javob berishlari kerakligini ta’kidladi. 

Tuman tibbiyot birlashmasi tomonidan bepul tibbiy ko‘rik tashkil etildi. Aholi mobil poliklinika xizmatidan foydalandi. Shu kuni ko‘rikka jalb etilgan malakali mutaxassislar tomonidan aniqlangan kasalliklar bo‘yicha bemorlarga maslahatlar berildi. Ularni sog‘lomlashtirish choralari ko‘rildi.