Nukusda “O‘zbekistonning qishloq joylarida davlat xizmatlarini ko‘rsatishni rivojlantirish va boshqaruv darajasini oshirish” loyihasi doirasida seminar-trening bo‘lib o‘tdi.

Davlat xizmatlari agentligi, Yevropa Ittifoqi va Birlashgan Millatlar Tashkiloti Taraqqiyot Dasturining O‘zbekistondagi vakolatxonasi hamkorligida o‘tkazilgan tadbirda Davlat xizmatlari agentligi Qoraqalpog‘iston Respublikasi boshqarmasi, shahar va tumanlar davlat xizmatlari markazi xodimlari, shuningdek, davlat xizmatlarini ko‘rsatishda hamkor tashkilotlar vakillari ishtirok etdi.

Ishtirokchilar loyiha doirasida davlat xizmatlarini ko‘rsatishda vujudga kelayotgan muammoli vaziyatlarni bartaraf etish, ko‘rsatilayotgan xizmatlarni soddalashtirish bo‘yicha fikr va takliflarini bildirdi.

– Ushbu loyihaning asosiy maqsadi qishloq joylarda davlat xizmatlari ko‘rsatish sifatini yanada rivojlantirishdan iborat, – deydi Davlat xizmatlari agentligi Qoraqalpog‘iston Respublikasi boshqarmasi bo‘lim boshlig‘i X.Nurimbetov. – Shuningdek, ushbu hududlarda istiqomat qiluvchi aholi uchun mazkur xizmatlardan foydalanishda qulayliklar yaratish va amaliyotda uchrashayotgan kamchiliklarni bartaraf etish muhim hisoblanadi.

Ta’kidlanganidek, mazkur seminar-trening davlat xizmatlari ko‘rsatish tizimining rivojiga, fuqarolarga, shu jumladan, chekka hudud aholisiga xizmat ko‘rsatish sifatini yanada yaxshilashga xizmat qilishi shubhasiz.

Tadbir ishtirokchilari o‘zlarini qiziqtirgan savollarga javoblar oldi.