Namangan viloyati hokimi Sh. Abdurazzaqov Namangan shahridagi “Bunyodkor” mahallasi aholisi bilan uchrashib, bugundan boshlab ushbu mahallada istiqomat qilishini bildirdi.

Eslatish joiz, Davlatimiz rahbari Shavkat Mirziyoyev 19 fevral kuni Namanganga tashrifi davomida ushbu mahallada bo‘lib, hududdagi ahvolni tanqid ostiga olgan edi.

– Sizlarga qo‘shni bo‘laman, uyim mahalla idorasining ro‘parasida joylashadi, - dedi viloyat hokimi Sh. Abdurazzaqov aholi bilan uchrashuv chog‘ida. – Bugun shu yerga konteyner o‘rnatiladi va unga “Viloyat hokimining uyi”, deb yozib qo‘yiladi. Hududdagi obodonlashtirish ishlarini o‘zim nazorat qilib boraman. Mahallaning 3 gektar joyida kichik sanoat zonasi tashkil etamiz va kamida 10 ta korxona ochamiz. Buning ortidan ming nafar odam ishli bo‘ladi. 

Erta tongdan ushbu mahallaga yuzlab ishchi va hasharchilar jalb etildi. Shaharning chekka hududida yerlarni tekislash, elektr tarmoqlarini tortish, obodonlashtirish ishlari boshlandi. Uzoq yillar davomida foydalanishda bo‘lgan chiqindixona yopiladigan, mahalla idorasi esa qaytadan quriladigan bo‘ldi. Asosiysi, mahallaga tez orada toza ichimlik suvi keltiriladi.