Andijon viloyati hokimi Shuhratbek Abdurahmonov Bo‘ston tumanida viloyat prokuraturasi, ichki ishlar, davlat solik boshqarmalari, shuningdek, qator tashkilot va korxonalar rahbarlari ishtirokida sayyor qabul o‘tkazdi.

Ayni kunda Bo‘ston tumanida 80 ming nafarga yaqin aholi istiqomat qiladi. Tumanda aholi farovonligini oshirish, turmush sharoitlarini yaxshilashga qaratilgan qator ishlar olib borilmoqda. Viloyat hokimi sayyor qabulda ana shu yo‘nalishdagi ishlar ko‘lamini kengaytirish, fuqarolarni qiynayotgan muammolarni hal etish, eng muhimi, odamlarni o‘z hayotidan rozi bo‘lib yashashlarini ta’minlash borasidagi ishlarni yanada yuqori bosqichga ko‘tarish zarurligini alohida qayd etdi.

Sayyor qabulda fuqarolarning ishga joylashish, yo‘llarni ta’mirlash, toza ichimlik suvi, elektr energiyasi ta’minoti, elektr liniyasi uchun yangi temir-beton ustunlar o‘rnatish, eskirgan transformatorlarni almashtirish, imtiyozli kredit olish, suyultirilgan gaz ballonlari ajratilishi, davolanish, nogironlik aravachasi olish, shuningdek, uy-joy, moddiy yordam, tadbirkorlikni qo‘llab-quvvatlash kabi masalalarga oid 300 dan ziyod murojaatlari qabul qilindi.

Murojaatlarning 200 dan ortig‘i shu joyning o‘zida hal etildi, ijrosi ma’lum muddat talab etadigan 74 masala yuzasidan mutasaddi tashkilotlar rahbarlariga qonuniy hal etish bo‘yicha topshiriqlar berildi.

- Nogironman, anchadan buyon o‘zimga mos ish topolmay yurgandim, - deydi Bo‘ston tumani Bo‘ston mahallasida yashovchi Gulbahor Hasanova. – Viloyat hokimiga shu masalada yordam berishini so‘rab murojaat qildim. Hokim tumanimiz markazidagi “Sabo teks” klaster korxonagiga tikuvchi bo‘lib ishga joylashishni tavsiya qilib, ishga joylashtirish bo‘yicha mas’ullarga topshiriq berdi. Nasib etsa, endi ana shu korxonaga ishga joylashaman.

Tumandagi Yangiobod mahallasida yashovchi Shoiraxon Abdullayeva qaromog‘ida uch nafar, kasalvand, nogiron farzandi bor. Katta qizi jigar serrozi bilan og‘riydi, o‘g‘li avtoxalokat natijasida oyog‘idan jarohat olib, bir joyda bo‘lib qolgan, kichik qizi ham kasalvand.

- Onaman, farzandlarim dardi, tashvishi bilan ko‘nglimga hech narsa sig‘maydi. Qabulga farzandimni operatsiyasiga yordam ko‘rsatilishini so‘rab murojaat qildim. Viloyat hokimiga dardlarimni aytdim. Qabulda sog‘liqni saqlash boshqarmasi boshlig‘i menga albatta, yordam berishga va’da berdi.

Shuningdek, qabul davomida 60 ta murojaat yuzasidan murojaatchilarga tushuntirishlar berildi.