Sirdaryo viloyati hokimi, senator G‘ofurjon Mirzayev tashabbusi bilan Respublika markaziy bankining Sirdaryo viloyat Bosh boshqarmasida ochiq muloqot o‘tkazilib, unda tadbirkor va ishbilarmonlarning muammolari o‘rganildi va takliflari tinglandi.

Unda murojaatlarni tezkorlik bilan bartaraf etish, samaradorlikni oshirish uchun viloyat sektor rahbarlari, hokim o‘rinbosarlari, sohaga daxldor idora, korxona va muassasalar rahbarlari ham ishtirok etdi.  

Yurtimizda tadbirkorlikni rivojlantirish va qo‘llab-quvvatlash maqsadida olib borilayotgan izchil islohotlar, tadbirkorlarga yaratilayotgan qulayliklar, berilayotgan imtiyozlar sabab, viloyatda tadbirkor va ishbilarmonlar soni ham ortib bormoqda.

Tadbir davomida qariyb 200 nafardan ortiq tadbirkor va o‘z biznesini boshlash istagida bo‘lgan fuqarolarning 250 ga yaqin murojaati ko‘rib chiqildi. Tadbirkor va ishbilarmonlar banklar tomonidan kredit ajratilishida kechikishlar, faoliyatini kengaytirish uchun qo‘shimcha yer maydoni ajratish, ishlab chiqargan mahsulotiga xaridor topish, ko‘rsatilgan xizmatlar uchun to‘lovlarni undirishda ko‘maklashish, elektr energiyasi kuchlanishi pastligidan ishlab chiqarish jarayonlarida sodir bo‘layotgan qisqa muddatli uzilishlarni bartaraf etish yuzasidan amaliy yordam so‘radi. Bundan tashqari sohalarni rivojlantirish, istiqbolli rejalarni amalga oshirishga doir bir qator taklif va fikrlar bildirildi.

Bildirilgan murojaatlarning aksariyati banklardan kredit olishda yuzaga kelayotgan muammolar bo‘lgani inobatga olinib, banklar faoliyati tahlil qilindi. bugungi kunda ko‘plab tadbirkorlik sub’ektlari, yuridik shaxslar tomonidan olingan kreditlar o‘z vaqtida qaytarilmayotganligi banklarning aylanma mablag‘iga salbiy ta’sir ko‘rsatayotgani ochiqlandi. Kredit olish masalasidagi muammolarning asosiy sabablaridan biri ayrim loqayd, e’tiborsiz mijozlar qarzdorliklari tufayli banklarning milliardlab mablag‘lari o‘rni qoplanmay qolayotgani oydinlashdi. Bu borada tadbir ishtirokchilariga batafsil ma’lumot berildi. Shundan so‘ng, muammolarni hal etish bo‘yicha bank va tegishli mutasaddi tashkilot rahbarlariga aniq ko‘rsatma va topshiriqlar berildi.

Muddat talab etadigan muammolar yuzasidan tegishli tartibda chora-tadbirlar belgilandi. Qonuniy yechimga ega bo‘lmagan ba’zi masalalarga huquqiy maslahatlar berildi.

Mirzaobodlik tadbirkor, Farhod Ermatov tumanning Mirzacho‘l hududidan o‘tuvchi Toshkent-Termiz katta magistral yo‘li atrofida “Qovunchilik milliy brendi”ni keng targ‘ib etish maqsadida qovun mahsulotlarini saqlash uchun maxsus omborxona, savdo ob’ektlari Sardoba suv toshqini vaqtida talofat ko‘rganligi bois, ushbu talofat oqibatlarini bartaraf etish, turizimni rivojlantirish uchun yangidan bunyod etilayotgan “Turizim kompleksi”ga toza ichimlik suvi keltirishda amaliy yordam so‘radi. Hokim ushbu masalani o‘rganib chiqish, toza ichimlik suvi liniyasi bilan bog‘liq muammoni bartaraf etish yuzasidan viloyat “Suvoqova”korxonasiga topshiriq berdi.

Oqoltinlik tadbirkor, “TRADE AGRO” ma’suliyati cheklangan jamiyati rahbari Murodjon Mamadaliyev esa tadbirkorlikni rivojlantirish, faoliyatini kengaytirish uchun tuman xududidan 1,5 gektar yer ajratishda amaliy yordam so‘radi. Bu masalaga shu joyning o‘zida yechim topildi. Unga tuman hududidan yer beriladigan bo‘ldi.