Paxtachi tumanidagi sektor rahbarlari tumandagi ota-onasiz, chin yetim bolalardan hol so‘rab, ularga qishki mavsum uchun kiyim-bosh tuhfa qildi.

– Ota-ona mehridan mahrum bo‘lgan bolalarni qo‘llab-quvvatlash, ularni jamiyatning faol a’zolari sifatida tarbiyalash barchamizdan jiddiy e’tibor va amaliy harakatlarni talab qiladi, – deydi tuman hokimligi bolalarni himoya qilish sho‘’basi mudiri D.Nomozov. – Shundan kelib chiqib, ularni zamonaviy kasb-hunarga o‘qitish, bilim olishiga shart-sharoit yaratish borasida tumanimizda ham amaliy ishlar olib borilmoqda. Ayni paytda kuz-qish mavsumi oldidan sektor rahbarlari tashabbusi bilan 35 nafar mehrga muhtoj bolalardan hol so‘ralib, ularga mehr-muruvvat ko‘rsatildi. Bir piyola choy ustidan dildan suhbat qurildi.

Tuman hokimi M.Hamdamov ota-ona qaramog‘isiz qolgan bolalarni ijtimoiy himoya qilish eng birinchi galdagi vazifa ekanligini ta’kidlab, ularning boshqa tengdoshlaridan kam bo‘lmay yashashi, ta’lim-tarbiya olishi uchun davlat tomonidan barcha shart-sharoit yaratib berilgani, ular rahbarlarning ham doimiy e’tiborida bo‘lishini qayd etdi.

Bolalarning har birigi kiyim-bosh berilishi bilan birga ularning ehtiyojidan kelib chiqib, homiylik yordamlari ham ko‘rsatildi.

– Oliy o‘quv yurtiga o‘qishga kirish uchun qo‘shimcha darslarda ishtirok etishim kerak edi, – deydi G.Qurbonova. – Tuman hokimligi bu masalada ham menga yordam berib, buning uchun to‘lovlarni to‘lab berishni o‘z zimmasiga oldi.