Buxoro viloyatining 544 ta mahalla fuqarolar yig‘inlarida faoliyat yuritayotgan hokim yordamchilari tomonidan aholi turmush darajasini yuksaltirish maqsadida asosiy drayver yo‘nalishlar belgilab olingan.

Endilikda yordamchilar tomonidan mahallalarda chorvachilik, parrandachilik, asalarichilik, issiqxonachalik, dehqonchilik, bog‘dorchilik, xizmat ko‘rsatish yo‘nalishlari rivojlantirilmoqda.

Romitan tumanidagi 1-sektorga qarashli “Qalaychorbog‘” mahalla fuqarolar yig‘ini aholisini ish bilan band qilish, doimiy daromadli bo‘lishini ta’minlash va tadbirkorlikka jalb qilish maqsadida hokim yordamchisi tomonidan “Mikrokredit bank” ATB tuman filialidan imtiyozli kredit asosida 42 ta oilaga jami 57 bosh qoramol, 10 ta xonadonga 50 ta qo‘y, 8 ta oilaga 400 bosh parranda tarqatildi. 4 ta xonadon tomorqa yer maydonida 9 sotix issiqxona tashkil etildi.

–  O‘zimizga biriktirilgan mahallani obod qilish, fuqarolar uchun zarur sharoitlarni yaratib berish, ularning bandligini ta’minlash va tadbirkorlikka jalb qilish asosiy maqsadimizdir, – deydi hokim yordamchisi Zamir Baxshullayev. – Ushbu tashkillashtirilgan ishlar mahallalarning iqtisodiy yuksalishiga, kambag‘allikni qisqartirishga, aholi farovonligini oshirishda muhim ahamiyat kasb etadi.