Toshkent viloyati hokimi qurilish, qishloq xo‘jaligi, turizm, iqtisod sohalarida 2022 yilda yaratiladigan yangi ish o‘rinlari taqdimoti bilan tanishdi. Qayd etilganidek, hudud bo‘yicha hozir jami bo‘sh ish o‘rinlari soni 39 mingdan ortmoqda.

Shuni e’tiborga olib, joylarda aholi bandligini ta’minlash, daromadlarini oshirishga har tomonlama ko‘maklashish, ishsizlar, ayniqsa, yoshlar va xotin-qizlar, bitiruvchilarga qulay sharoit yaratish maqsadida bir qator ishlar qilinyapti.

Jumladan, 2022 yilda moliya-iqtisod, tadbirkorlik va kambag‘allikni qisqartirish yo‘nalishida 146 ming 791 ta yangi ish o‘rinlari yaratish rejalashtirilgan. Investitsiya sohasida 464 ta umumiy qiymati 17,7 trillion so‘mlik loyihalar amalga oshiriladi. Bu orqali 20 mingga yaqin ish o‘rni tashkil etiladi. Shuningdek, qishloq xo‘jaligi tarmoqlarida jami 229 ming nafar aholi bandligini ta’minlash ko‘zda tutilgan. Joylarda takroriy ekin uchun ajratilgan yer maydonlarida hosil yetishtirish evaziga ishsizlarning 20 foizga yaqini band bo‘lib, mavsumiy daromad olishiga erishiladi. Turizm sohasida esa 13,5 mingta ish o‘rni yaratilishi mumkin. 

Zoyir Mirzayev mazkur loyihalar bo‘yicha bosqichma-bosqich amalga oshiriladigan ishlar, eng birinchi qadamlar nimalardan iborat bo‘lishi lozimligi yuzasidan o‘z fikr-mulohazalarini bildirdi. Mutasaddilarga bu borada zarur ko‘rsatmalar berdi.