Yurtimizda Prezidentimiz tashabbusi bilan joriy qilingan “Ayollar daftari”, “Yoshlar daftari”, “Temir daftar” tizimi ijtimoiy himoyaga muhtoj xotin-qizlar, yoshlar va oilalar vakillarini ijtimoiy, iqtisodiy, qo‘llab-quvvatlash, huquqiy, psixologik ko‘mak berish, ularning bilim va kasb o‘rganishiga, ish bilan ta’minlanishiga yordamlashishda muhim ahamiyat kasb etmoqda.

Oliy Majlis Qonunchilik palatasi Spikeri N.Ismoilov ushbu oqilona tizimlar chet elliklar tomonidan o‘rganilayotganini qayd etdi:

—  Mamlakatimizda o‘z vaqtida joriy qilingan “Ayollar daftari”, “Yoshlar daftari”, “Temir daftar” tizimini chet elliklar bizdan o‘rganmoqda. Chunki ushbu tizim koronavirus pandemiyasi vaqtida juda qo‘l keldi. Karantin vaqtida ko‘plab tarmoqlarda faoliyat vaqtincha to‘xtab qolganda, aholi vakillari ishsiz qolgan paytda ana shu tizimlar orqali aholiga manzilli ko‘mak berildi. Biz shoshib qolmadik, kimga, qaysi oilaga ko‘mak zarur, qaysi oilaning sharoiti qanday — bu masalalarda “daftarlar” orqali tizimli yo‘l tutildi.