Shu yilning 5-11 may kunlari Farg‘ona viloyatining shahar va tumanlarida ommaviy sayyor qabullar o‘tkazilmoqda.

Bundan ko‘zlangan maqsad fuqarolar muammolari bilan samarali ishlash, yechimini kutayotgan masalalarni “mahallabay” o‘rgangan holda joyida va tezkor hal etish, aholi bilan to‘g‘ridan-to‘g‘ri muloqot tizimini yanada takomillashtirishga qaratilgan.

Ommaviy sayyor qabullarning dastlabkisi Qo‘qon shahridagi Qo‘qon universiteti hovlisida o‘tkazildi. 

Sudyalar Oliy kengashi, Oliy sud, Bosh prokuratura, Ichki ishlar, Iqtisodiy taraqqiyot va kambag‘allikni qisqartirish, Sog‘liqni saqlash, Bandlik va mehnat munosabatlari, Mahalla va nuroniylarni qo‘llab quvvatlash, Favqulodda vaziyatlar, Qurilish, Uy-joy kommunal xizmat ko‘rsatish, Xalq ta’limi vazirliklari, Oila va xotin-qizlar davlat qo‘mitasi, Markaziy bank va bir qator idora rahbarlari va rahbar o‘rinbosarlari ishtirokidagi qabulda Qo‘qon shahri, Beshariq, Dang‘ara, O‘zbekiston va Furqat tumanlari aholisi qamrab olindi.

Unda 100 dan ziyod fuqarolar o‘z muammolari bo‘yicha murojaat qildi. Aksariyat masalalar shu joyning o‘zida tegishli rahbarlar ishtirokida hal etildi. Respublika miqyosidagi va vaqt talab etiladigan shikoyatlar ham nazoratga olinib qisqa vaqtda hal etish bo‘yicha ko‘rsatmalar berildi.

-Beshariq tumanining “Shodlikobod” mahalla fuqarolar yig‘ini hududida yashayman,-deydi Otabek Qoraboyev. – Bugun nogironlik nafaqasi tayinlash bo‘yicha amaliy yordam so‘rab qilgan murojaatim ijobiy hal etildi.

Ta’kidlash joizki, bu kabi sayyor qabullar viloyatning Bag‘dod, Qo‘shtepa, Farg‘ona tumani hamda Marg‘ilon shahrida bo‘lib o‘tishi ko‘zda tutilgan.