Nukus shahridagi Yoshlar markazida “Yoshlar daftari”ga kiritilgan yoshlarga o‘z-o‘zini band qilish maqsadida subsidiya asosida asbob-uskunalar topshirildi.

Tadbirda Nukus shahri 4 ta sektor rahbarlari, yoshlar va ota-onalar ishtirok etdi.

Yoshlar ishlari agentligi direktori o‘rinbosari F.Ablayarov, agentlikning Qoraqalpog‘iston Respublikasi boshqarmasi boshlig‘i P.Maxsetbayev va boshqalar Nukus shahar yoshlarining ijtimoiy-iqtisodiy muammolari, taklif va istaklarini o‘rganish, ularni hal etish borasida bir qator chora-tadbirlar amalga oshirilayotganini ta’kidladi. Natijada yoshlarning ijtimoiy-iqtisodiy muammolarini aniqlash va bartaraf etishga qaratilgan “Nukus shahar tajribasi” yaratildi.

Yoshlar yetakchilari bilan birgalikda 64 ta mahallada uyma-uy xatlov ishlari amalga oshirilib, 14-30 yoshdagi 74 ming 683 nafar yoshning balansi to‘liq shakllantirildi. Ushbu asosda aniqlangan har o‘n beshinchi ishsiz va ijtimoiy himoyaga muhtoj bo‘lgan 4 ming 820 nafar fuqaro 19 ta ko‘mak turi bo‘yicha “Yoshlar daftari” elektron platformasiga kiritildi.

Bundan tashqari, Nukus shahrida “Yoshlar daftari”ga kiritilganlarga amaliy yordam ko‘rsatish ishlari boshlanib, ularning ijtimoiy-iqtisodiy muammolarini hal etish choralari ko‘rilmoqda. Yoshlar ishlari agentligi mablag‘i hisobidan 311 nafar yoshning safarbarlik chaqiruvi rezervidagi xizmati badali, 176 nafarining haydovchilarni tayyorlash o‘quv kursi xarajatlari uchun 2,2 milliard so‘m to‘lab berildi.

Tadbir yakunida 677 nafar yoshga subsidiya asosida asbob-uskunalar topshirildi.