Davlatimiz rahbari topshirig‘iga asosan tuzilgan Respublika ishchi guruhining Qashqadaryo viloyatidagi ommaviy qabullari Koson tumanidagi Navbahor mahallasida bo‘lib o‘tdi.

 Unda Prezident Xalq qabulxonasi, Bosh prokuratura, o‘ndan ziyod vazirliklar, qo‘mita va respublika tashkilotlari, viloyat sektorlari mas’ullari asosan Qarshi shahri, Koson, Muborak va Ko‘kdala tumanlaridan kelgan murojaatchilar bilan yuzma-yuz muloqotda bo‘ldi.Unda tadbirkorlik yo‘nalishidagi qator masalalar ham joyida hal qilindi.

Jumladan, kosonlik tadbirkor Alisher Omonov tashkil qilgan chorvachilik majmuasida ming bosh qo‘y-echki, 200 bosh qoramol parvarishlanib, aholiga arzon va sifatli go‘sht-sut yetkazib berilmoqda. Faoliyatini yanada kengaytirishni niyat qilgan tadbirkorga Markaziy bank mas’ullariga murojaatidan so‘ng 1 milliard so‘m kredit ajratishga qaror qilindi.    

Muboraklik tadbirkor G‘ayrat Aliqulov korxonasi faoliyatini kengaytirish maqsadida 60 ming dollar kredit olishda muammolarga duch kelgan edi. Murojaatdan so‘ng bu masala ham o‘rganilib, tadbirkorga qonun doirasida amaliy yordam ko‘rsatiladigan bo‘ldi.   

Shuningdek, Koson tumani Nartichuqur mahallasida yashovchi G‘ayrat Bo‘riyevning 1994 yildan buyon tadbirkorlik faoliyatini olib borayotgan binosini kimdir soxta hujjatlar bilan rasmiylashtib, sotib yuborishga urinayotganiga oid shikoyatini Bosh prokuratura mas’ullari o‘z nazoratiga oldi. Ushbu masala qonuniy-batafsil o‘rganilib, adolatli hal qilinadigan bo‘ldi. 

Avtomobil yo‘llari qo‘mitasi mas’ullari esa muboraklik  yosh tadbirkor Sardor Egamberdiyevning tumandagi Xitoy qishlog‘idan o‘tuvchi trassa bo‘yida avtobekat qurib, xizmat ko‘rsatishni tashkil etishga oid loyihasini joyiga chiqib o‘rganib, qonuniy yordam ko‘rsatadigan bo‘ldi.  

Kosonlik tashabbuskor tikuvchi Farida Sohibovaga esa tumanning Esaboy kishlog‘idagi tikuvchilik korxonasida xotin-qizlarga kasb-hunar o‘rgatib, ularning bandligini ta’minlashi uchun mahalliy byudjet hisobidan 10 ta tikuv mashinasi olib berildi.