Farg‘ona viloyati Beshariq tumanida vazirlik va idora rahbarlaridan iborat Respublika ishchi guruhi ijtimoiy-iqtisodiy sohalarda yillar davomida yig‘ilib qolgan muammolarni yaqindan o‘rgandi. O‘rganish ishlari 4 ta sektor kesimida 62 ta mahallani qamrab oldi.

Ishchi guruh tomonidan ikkinchi sektordagi 9 mingdan ortiq xonadonlar to‘liq o‘rganildi. Bu jarayonda 3 ming 200 dan oshiq muammolar aniqlanib, 2 ming 350 tasi ijobiy hal etildi.

Xususan, “Pastki Yangiqo‘rg‘on” MFYda 3 mingdan oshiq aholi istiqomat qiladi. Mahallada kuz-qish mavsumi boshlanishi bilan elektr energiyasi ta’minoti izdan chiqishi odatiy hol edi. Bu muammoni bartaraf etish maqsadida 83 dona temir-beton tayanchlar o‘rnatilib 3,7 km tarmoq tortildi va yangi transformator o‘rnatildi. Natijada mahallaning elektr ta’minoti yaxshilandi.

“Adolat” MFYda esa ko‘p yillardan buyon kuzatilayotgan toza ichimlik suvi muammosi o‘z yechimini topib, xonadonlardagi jo‘mraklarda zilol suv oqa boshladi.

Respublika ishchi guruhi sa’y-harakati bilan ichki yo‘llarni ta’mirlash, aholiga suyultirilgan gaz ballonlari, ko‘mir yetkazish, tibbiy ko‘riklar tashkil etish, fuqarolarga kadastr hujjatlarini rasmiylashtirish, bank krediti olish, aliment to‘lovlarini undirishga ko‘maklashish, “Ayollar daftari”dagi xotin-qizlar muammolarini o‘rganish ishlari o‘zining amaliy natijasini bermoqda.