Andijon viloyati harbiy prokuraturasi tomonidan Asaka tumanida sayyor qabul o‘tkazildi.

Andijon viloyati harbiy prokurori, adliya polkovnigi Abdumalik Abdusamadov rahbarligida tashkil etilgan sayyor qabulda aholi, xususan, harbiylar va oila a’zolarini qo‘llab-quvvatlash, ularning murojaatlarini eshitish, mavjud muammolarini bartaraf etishga qaratilgan keng ko‘lamli ishlar olib borilayotganligi ta’kidlandi.  

Sayyor qabul davomida yoshlar, ayollar, Qurolli Kuchlar xizmatchilari hamda oila a’zolarining turli masalalar bo‘yicha murojaatlari eshitildi.  

Murojaatlarning 6 tasi shu yerning o‘zida ijobiy hal qilindi, ma’lum vaqt talab etadigan 3 ta murojaatni o‘rganish va hal etish mutasaddi tashkilotlar rahbarlariga yuklanib, ijrosi nazoratga olindi. Bir necha murojaat bo‘yicha huquqiy tushuntirishlar berildi.  

Sayyor qabul doirasida viloyat harbiy prokurori tuman favqulodda vaziyatlar bo‘limi xodimlari bilan muloqot o‘tkazdi. Muloqotda harbiy xizmatchilarning, xususan, favqulodda vaziyatlar boshqarmasi tizimi xodimlarining huquq, erkinlik va qonuniy manfaatlari himoyasi, sohada  qonun ustuvorligini ta’minlash, bu boradagi muhim vazifalar xususida atroflicha so‘z yuritildi.  

Sayyor qabul va muloqot ishtirokchilari o‘zlarini qiziqtirgan barcha savollarga viloyat harbiy prokuraturasi mutasaddilaridan batafsil javob oldi.