Orol dengizining suvi qurigan tubida “yashil qoplamalar” – himoya o‘rmonzorlari barpo etish, shu orqali hududda mavjud ekologik vaziyatni sog‘lomlashtirish, atrof-muhitni muhofaza qilish, aholi hayotiga salbiy ta’sirni yanada yumshatish borasida “Dengiz chekinsa ham, inson chekinmaydi” shiori ostidagi joriy yilgi ishlarga start berildi.

2023 yilgi saksovul ekish mavsumining boshlanishi munosabati bilan tashkil etilgan tadbirda O‘zbekiston Respublikasi Tabiat resurslari va Favqulodda vaziyatlar vazirliklari mutasaddilari, Oliy Majlis Qonunchilik palatasi deputatlari, O‘zbekiston Ekologik partiyasi faollari, keng jamoatchilik vakillari, yoshlar, ekologlar va o‘rmonchilar ishtirok etdi.  

Davlatimiz rahbari tashabbusi bilan Orol dengizining suvi qurigan tubida "yashil qoplamalar” – himoya o‘rmonzorlari barpo etish, Orolbo‘yi mintaqasini ijtimoiy-iqtisodiy rivojlantirish, aholi turmush darajasini yanada yaxshilashga qaratilgan keng qamrovli ishlar amalga oshirilmoqda. Jumladan, Orol dengizining qurigan tubida 1,7 million gektar maydonda saksovul, cherkez, qandim kabi sho‘rga va qurg‘oqchilikka chidamli o‘simliklardan iborat yashil qoplamalar barpo etildi.  

Ushbu ishlarni tizimli davom ettirish maqsadida O‘zbekiston Respublikasi Vazirlar Mahkamasining 2022 yil 18 yanvardagi “Orol dengizining suvi qurigan tubida va Orolbo‘yi hududlarida “yashil qoplamalar” – himoya o‘rmonzorlarini barpo etishning qo‘shimcha chora-tadbirlari to‘g‘risida” gi qarori ijrosi doirasida keng ko‘lamli chora-tadbirlar olib borilmoqda. Jumladan, 2022 yilda 107 ming gektar maydonda saksovul va boshqa cho‘l o‘simliklaridan “yashil qoplamalar” barpo etildi. Jami 590 tonnadan ziyod cho‘l o‘simliklarining urug‘i jamg‘arildi. 100 gektar saksovul va boshqa cho‘l o‘simliklaridan niholxonalar tashkil etildi. Mazkur ishlarni bajarish uchun 635 nafar ishchi-xodim, 250 dona yuqori unumli traktor va 2 dona kichik aviatsiya (AN-2) jalb etildi. E’tiborlisi, barpo etilgan “yashil qoplamalar” soha olimlari tomonidan doimiy monitoring qilinib, cho‘l o‘simliklarining ko‘karishi bo‘yicha yaxshi natijalarga erishilmoqda.

2023 yilda 100 ming gektar maydonda himoya o‘rmonzorlari hisoblanuvchi “yashil qoplamalar” barpo etish rejalashtirilgan. Buning uchun jami 420 tonna saksovul, qandim, qoraburoq kabi cho‘l o‘simliklarining urug‘i jamg‘ariladi. 100 gektar maydonda saksovul va boshqa cho‘l o‘simliklaridan niholxonalar tashkil etiladi. Zarur miqdordagi texnika va mexanizmlar, mutaxassis va ishchi-xodimlar o‘rmon meliorativ tadbirlarini amalga oshirish uchun jalb etiladi.  

Qoraqalpog‘iston Respublikasi Jo‘qorg‘i Kengesi Raisi A.Orinbayev ishtirok etgan tadbirda xayrli ishda qatnashayotgan bir guruh xodimlar rag‘batlantirildi.