Jizzax viloyati kambag‘allikni qisqartirish va bandlik bosh boshqarmasi boshlig‘i Fayzullo Salohiddinov Sharof Rashidov tumani hamda Jizzax shahri yoshlari bilan muloqotda bo‘lib, ularni qiynab kelayotgan muammolarini tingladi.

Tadbirda yoshlar kelgusida har xil salbiy holatlarni keltirib chiqarmasligi, turli diniy ekstremistik guruhlarning aldovlariga uchmaslik, bo‘sh vaqtlarini mazmunli o‘tkazish, o‘zlaridagi mavjud iqtidorlarini namoyon etib, faqat ijobiy tomondan ko‘rsatishi, barchaga namuna bo‘lishi ta’kidlandi va o‘z navbatida yoshlarning muammolari tinglab o‘rganildi. 

Uchrashuvda jizzaxlik yoshlar tomonidan asosan bandlik, ekin ekib foydalanish uchun uzoq muddatga yer ajratish, kichik, yakka tartibdagi, oilaviy biznesni yuritishi va tadbirkorlikni boshlashi uchun subsidiya hamda imtiyozli kredit ajratilishida amaliy yordam hamda bo‘sh vaqtlarini mazmunli o‘tkazishlari uchun qo‘shimcha sport va ko‘ngil ochar majmualar barpo etish kabi murojaatlar ko‘tarildi.

Har bir yosh murojaatchining takliflari diqqat bilan eshitilib, qayd etib borildi. Murojaatlarning 10 foizi joyida hal qilingan bo‘lsa, ishga joylashtirish, yer, subsidiya va kredit mablag‘lari ajratish masalalari yuzasidan bo‘lgan murojaatlar bo‘yicha mutasaddi tashkilot rahbarlariga topshiriqlar berilib, ijrosining aniq muddati belgilandi. 
Yoshlar bo‘sh vaqtlarini mazmunli o‘tkazish borasidagi ko‘tarilgan masalalarni ijobiy hal qilish, tegishliligi bo‘yicha Sharof Rashidov tumani hamda Jizzax shahri hokimliklari zimmasiga yuklatildi.