Yangi yil bayrami arafasida Samarqand viloyatining Kattaqo‘rg‘on tumanida bir qator ijtimoiy soha ob’ektlari foydalanishga topshirildi.

Yakuniga yetayotgan yilda tumanda 28 ta ijtimoiy soha ob’ektida qurilish-montaj ishlari olib borildi. Bu maqsadlar uchun qariyb 50 milliard so‘m mablag‘ sarflandi.

Jumladan, 12 ta umumta’lim maktabi zamon talablariga moslashtirilib, o‘quvchilarning sifatli ta’lim olishi uchun keng imkoniyatlar yaratildi. 8 ta maktabgacha ta’lim tashkiloti foydalanishga topshirildi. 2 ta umumta’lim  maktabida zamonaviy sport zali, 2 ta umumta’lim  maktabida faollar zali va kutubxona qurildi.

Tuman aholisiga tibbiy xizmat ko‘rsatish sifatini yanada oshirish maqsadida 2 ta oilaviy shifokorlik punkti, tez tibbiy yordam ko‘rsatish bo‘limi bunyod etildi, 1 ta oilaviy shifokorlik punkti kapital ta’mirlandi.

– Bu kabi qurilish-bunyodkorlik, obodonlashtirish ishlari xalqimiz farovonligiga, ular uchun munosib turmush sharoiti yaratishga qaratilgan, – deydi Kattaqo‘rg‘on tumani hokimi Jamshid Nasriddinov. – Kelgusi yilda bundan ham ko‘p ob’ektlar qurishni rejalashtirganmiz. Xalqimiz hamjihat bo‘lib, amalga oshirilayotgan islohotlarni qo‘llab-quvvatlasa, yonimizda tursa, bundan ham yuqori natijalarga erishamiz, albatta.