Mamlakatimizda aholining, ayniqsa, qishloq aholisining yashash sharoitlarini yaxshilash, turmush farovonligini yuksaltirish masalalariga alohida e’tibor qaratilmoqda. Jumladan, Prezidentimiz tashabbusi bilan amalga oshirilayotgan “Obod mahalla – obod ko‘cha –obod xonadon " dasturi ana shu yo‘nalishdagi ishlarni yanada yuqori bosqichga ko‘tarishga xizmat qilmoqda.

Andijon viloyatida joriy yilda tanlab olingan 4 ta – Asaka tumanidagi Ergashobod, Oltinko‘l tumanidagi Intizom, Xo‘jaobod tumanidagi Yangi hayot hamda Shahrixon tumanidagi Oq oltin mahallalarida “Obod mahalla– obod ko‘cha– obod xonadon" dasturi doirasida qurilish, bunyodkorlik, obodonlashtirish hamda aholi muammolarini bartaraf etish, shuningdek, elektr energiyasi, ichimlik suvi, tabiiy va suyultirilgan gaz ta’minotini, ichki yo‘llarni yaxshilash bo‘yicha keng ko‘lamli ishlar olib borilmoqda.  

Dastur doirasida Xo‘jaobod tumanidagi Yangi hayot mahallasida Andijon avtomobil yo‘llari bosh boshqarmasi, Xo‘jaobod tumani yo‘llardan foydalanish davlat muassasasi ishchi-mutaxassislari tomonidan mahalla ko‘chalariga shag‘al va asfalt yotqizilmoqda, obodonlashtirilmoqda.  

–Mahalladagi beshta – Buloq, Eskilik, Yangi avlod, Qondi hamda Barkamol avlod ko‘chalarida jami 15 kilometrdan ziyod yo‘llar mavjud, – deydi Xo‘jaobod tumani yo‘llardan foydalanish davlat muassasasi bosh muhandisi Kenjabek O‘zganboyev. –  Ayni kunga qadar Buloq, Eskilik va Yangi avlod  ko‘chalarining 4,5 kilometr qismiga shag‘al yotqizildi. Eskilik ko‘chasining    1 kilometr qismi asfalt qilindi.  

Yo‘llarni yaxshilash bo‘yicha belgilangan ishlarni amalga oshirish uchun ishchi-mutaxassislar, zarur texnika vositalari jalb etilgan. Ayni kunlarda ko‘chalarni obodonlashtirish jarayoni qizg‘in davom etmoqda.