Sirdaryo viloyati hokimi Akmaljon Mahmudaliyev Guliston shahridagi Yoshlar markazida umumta’lim maktabini tamomlayotgan bir guruh faol yoshlar bilan uchrashdi.

Videokonferensiya aloqa shaklida bo‘lib o‘tgan uchrashuvda ta’limga oid ko‘plab istiqbolli loyihalar asoschisi Umidjon Ishmuhammedov, bitiruvchilar, ularning ota-onalari hamda o‘qituvchilar ishtirok etdi. Viloyat hokimi yoshlar bilan dildan suhbatlashib, ularni jamiyatning ilg‘or qatlamlari qatoridan o‘rin egallash sari undadi. Buning uchun esa birinchi navbatda aniq maqsad bo‘lishi va maqsadga erishish uchun esa to‘g‘ri yo‘l, o‘qish, izlanish kerakligi bo‘yicha tavsiyalar berdi. 

Davlatimiz rahbari tomonidan olib borilayotgan bugungi davlat siyosati zamirida yoshlar kelajagi bilan bog‘liq har qanday vazifa birlamchi ahamiyatga ega ekanligi ta’kidlandi. Yoshlarning taklif va tashabbuslari tinglandi, hal etish lozim bo‘lgan masalalar yechimi bo‘yicha aniq choralar belgilandi. Yil davomida maktab hayotida faol ishtirok etgan ota-onalar, a’lo baholari, odob-axloqi, intiluvchanligi bilan tengdoshlariga o‘rnak bo‘lgan, xalqaro hamda respublika darajasidagi tanlov va musobaqalarda munosib ishtirok etib, faxrli o‘rinlarni qo‘lga kiritgan yoshlar taqdirlandi. 

Shuningdek, muddatidan avval nufuzli oliy o‘quv yurtlariga o‘qishga kirgan iqtidorli bitiruvchilarga tashakkurnoma va esdalik sovg‘alari topshirildi. Bundan tashqari, viloyatdagi 40 ta maktabga umumiy qiymati 1 milliard so‘m bo‘lgan zamonaviy elektron doskalar topshirildi. 
Ma’lumot o‘rnida, joriy o‘quv yilida viloyatda 10 ming 251 nafar o‘quvchi o‘rta maktabni tamomlaydi. Ularning 371 nafari muddatidan oldin OTMga talabalikka tavsiya etilgan.