Sirdaryo viloyatida 12 ming 751 gektar aholi tomorqasi mavjud. Guliston va Mirzaobod tumanlarida bunday ekin maydonlari 2 ming 917 gektarni tashkil etadi.

Viloyat davlat soliq boshqarmasi – 4-sektor hududiga qarashli ushbu tumanlarda bahorgi ekin ekish uchun asosiy maydonlar tayyor holga keltirildi. Ertagi sabzavotlar jami maydonning 355 gektar qismiga ekilib, bu boradagi ishlar davom ettirilayotir.

Albatta, hosilning sifati va unumdorligi ko‘p jihatdan urug‘likka bog‘liq, shuning uchun, avvalo, tomorqaga ekish uchun sifatli urug‘lik zaxirasi yaratildi. Serhosil, suvsizlik va kasallikka chidamli mevali daraxtlarning 4 mingdan ortiq tupi tomorqalarga ekib bo‘lindi.

– Mehnatdan kelsa boylik, turmush bo‘lar chiroylik, deb bejiz aytishmaydi, – deydi Guliston tumani Ibrat mahallasida yashovchi Olimjon Rasulev. – Tomorqa orqasidan oilamiz daromadi ortib, dasturxonimizga qut-baraka kirmoqda. Tomorqada ro‘zg‘orga kerakli qishloq xo‘jalik mahsulotlari yetishtiramiz. Bu yil ham karam ko‘chatini o‘zimiz yetishtirib, tomorqaga ekdik. Ko‘chatlarning qolganini qo‘ni-qo‘shni, qarindosh-urug‘larga tarqatdik. Bundan tashqari, asalarichilikni ham yo‘lga qo‘yganmiz. Hozir 10 quti asalari boqyapmiz.

Ibrat mahallasining Sirdaryo ko‘chasida 100 dan ortiq xonadon bor. Bu ko‘chada istiqomat qiluvchilarning asosiy qismi tomorqaga kartoshka, sarimsoqpiyoz, rediska, turli ko‘katlar ekishgan.

Ammo hududdagi ayrim tomorqa egalarining hafsalasizligidan ko‘ngil ranjiydi.

– Ikki tumandagi 8 ming 886 xonadon o‘rganilib, ularning 732 tasida tomorqadan samarali foydalanilmayotgani aniqlandi, – deydi viloyat davlat soliq boshqarmasi boshlig‘i, 4-sektor rahbari Jo‘rabek G‘oyibov. – Bu xonadonlarda tushuntirish ishlari olib borildi. Bu kabi harakatlar o‘z samarasini berib, foydalanilmayotgan yer maydonlari qisqarishiga erishilmoqda.