Tinchlik uchun kurashgan insonlar har doim yuksak e’tibor va hurmatga loyiq. Ular haqiqiy ma’nodagi qahramonlardir.

Mana shunday ezgu maqsad yo‘lida halok bo‘lganlar xotirasi esa muqaddas. Shu bois xalqimiz Ikkinchi jahon urushida halok bo‘lgan minglab yurtdoshlarimiz xotirasini doim hurmat bilan yod etadi.

Olovli janggohlardan omon qaytgan, front ortida mehnat qilgan, mashaqqatli sinovlarni matonat bilan yenggan, hozir ham hayot bo‘lgan insonlar esa doim ardoqda.

O‘zbekiston Respublikasi Prezidentining 2019 yil 23 apreldagi “Xotira va qadrlash kuniga tayyorgarlik ko‘rish va uni o‘tkazish chora-tadbirlari to‘g‘risida”gi qarori shu maqsadga xizmat qilmoqda.

Favqulodda vaziyatlar vazirligi Yong‘in xavfsizligi bosh boshqarmasi rahbariyati va mas’ul xodimlari Ichki ishlar vazirligi ashula va raqs ansamblining san’atkorlari bilan birga Ikkinchi jahon urushidan so‘ng Yong‘in xavfsizligi xizmatida faoliyat olib borgan va hozirgi kunda iste’fodagi bir guruh faxriylarimiz xonadoniga borib, ularning holidan xabar oldi.

Faxriylar bilan suhbat chog‘ida beshafqat urushda bo‘lib o‘tgan voqealar, xizmat vaqtidagi unutilmas jarayonlar haqida tinglab, urushning ayanchli oqibatlarini unutmaslikka, tinchlik va osuda hayotning qadriga yetishga, Vatanga sadoqat hissi bilan yashashga, shuningdek doimo ogoh va hushyor bo‘lishga, hamisha shukronalik bilan yashash haqida so‘z bordi.

O‘zbekiston davlat akademik rus drama teatrida 9 may – Xotira va qadrlash kuniga bag‘ishlangan madaniy-ma’rifiy tadbir ham tashkil etildi. Unda xizmat xodimlari, 40 nafarga yaqin Ikkinchi jahon urushi qatnashchilari va mehnat faxriylari ishtirok etdi.

Tinchlik, mehr-oqibat, sadoqat, jasorat kabi mavzularda kuylangan kuy-qo‘shiqlar ishtirokchilarga ko‘tarinki kayfiyat bag‘ishladi. Tadbir so‘nggida faxriylarga bayram dasturxoni yozildi.

Muattar RO‘ZIBOEVA, O‘zA