Uy-joy kommunal xizmat koʻrsatish vaziri Muzaffar Saliyev Toshkent viloyatining Quyi Chirchiq va Oqqoʻrgʻon tumanida sayyor qabul oʻtkazdi.

Bu haqda viloyat hokimligi axborot xizmati xabar qilmoqda. Qayd etilishicha, bevosita xalq bilan toʻgʻridan-toʻgʻri muloqot qilish, ularning muammolarini oʻrganish va yechim topish maqsadida vazirning Quyi Chirchiq tumaniga tashrifidan ayniqsa, “Bogʻiston” mahallasi Elobod koʻchasi 27-uyda yashovchilar mamnun boʻldi. Gap shundaki, bir oy muqaddam Nadya Moiseyeva shu uyda yashovchi 18 ta oila nomidan vazirga murojaat qilib, koʻp qavatli uyning tomini yopishda amaliy yordam soʻragan edi. Ushbu murojaat atroflicha oʻrganilib, vazir tashabbusi bilan 20 kunda uyning tomi yopib berildi.

Maʼlumki, turar-joy, gaz, suv, kanalizatsiya tizimiga yillar mobaynida yetarli darajada eʼtibor qaratilmagani sababli bugungi kunda mazkur tizimda muammolar yigʻilib qolgan. Bu esa ushbu yoʻnalish boʻyicha aholini qiynayotgan masalalarga alohida eʼtibor qaratishni taqozo etayapti.

Quyi Chirchiq tumanidagi sayyor qabulda aholi tomonidan gaz, suv, uy-joy, yoʻl taʼmiri, transport qatnovi, elektr taʼminoti bilan bogʻliq 24 ta murojaat tushdi. Shundan 5 tasi joyida hal etildi. Ijrosi maʼlum muddat vaqt talab etadigan 19 murojaatni hal etish boʻyicha tegishli tashkilotlarga topshiriq berildi.

Shuningdek, vazir Oqqoʻrgʻon tumani “Eltamgʻali” mahallasida ham sayyor qabul oʻtkazdi. Mazkur hududda ayni paytda 4 ming 300 nafardan ziyod aholi istiqomat qiladi. Hududda soʻnggi paytlarda elektr energiyasiga talab ortib, mavjud transformatorlarni yangisiga almashtirish zaruriyati tugʻilgan edi.

Mahalla ahlining bu boradagi murojaati vazir topshirigʻiga koʻra ijobiy yechim topadigan boʻldi. Shuningdek, fuqarolarning gaz, suv, yoʻl taʼmiri kabi masalalar boʻyicha murojaati oʻrganish va hal etish uchun tegishli tashkilotlar ish rejasiga kiritildi.

Avazbek Xudoyqulov, OʻzA muxbiri