Navoiy shahar hokimi Muhiddin Bozorov 1-sektor hududidagi mahalla fuqarolar yigʻinlari yoshlari bilan uchrashdi.

Prezidentimizning 2019-yil 27-dekabr kuni yoshlar bilan oʻtkazgan uchrashuvida belgilab berilgan topshiriqlar ijrosi yuzasidan yosh avlodning muammolarini oʻrganish, fikr va takliflarini eshitish, tashabbuslarini qoʻllab-quvvatlash maqsadida tashkil etilgan ochiq muloqotda 150 nafar yigit-qiz ishtirok etdi. Ularning asosiy qismi ish bilan band boʻlmagan yoshlardir.

Uchrashuvda yoshlardan kelib tushgan murojaatlarning 24 tasi joyida hal etildi. 43 ta murojaat mutasaddi tashkilotlarga koʻrib chiqish uchun yoʻnaltirilib, ijrosi nazoratga olindi. 5 ta masala boʻyicha yoshlarga huquqiy maslahat berildi.

– Madaniyat va sanʼat kollejini tamomlaganimga 3 yil boʻldi, — deydi Guliston mahallasi Oybek koʻchasida yashovchi Madina Rasulova. – Uchrashuvda ish topishda yordam soʻrab murojaat qildim. Masalam ijobiy hal etilib, “Navoiy avto savdo” masʼuliyati cheklangan jamiyatiga ishga joylashish uchun yoʻllanma berildi. Bundan juda xursandman.

Bir guruh yoshlar shahar Bandlikka koʻmaklashish markazida tashkil etilgan oʻquv kurslarida qayta kasbga tayyorlash uchun yoʻnaltirildi. Ikki oy davom etadigan oʻquv kurslarida yoshlarga stipendiya ham beriladi.