Сирдарё вилояти ҳокими Акмалжон Маҳмудалиев Мирзаобод тумани “Навбаҳор” маҳалласида сайёр қабул ўтказди. Унда фуқароларнинг қонуний манфаатларини ҳимоялаш ва уларни қийнаётган муаммоларни бартараф этишга алоҳида эътибор қаратилди.

Вилоят ҳокими ўринбосарлари, туман сектор раҳбарлари, ҳудудий бошқарма, ташкилот, муассаса мутасаддилари иштирокидаги қабулда 50 дан зиёд фуқаронинг ичимлик суви, ички йўллар, таълим, тиббиёт, электр, кадастр ва пенсия масаласига оид мурожаатлари тингланди. Қабулда кун тартибидаги энг долзарб мурожаатларнинг аксарияти ўз ечимини топди. Муддат талаб қиладиган масалалар мутасаддилар томонидан назоратга олинди.  

Жумладан, “Баҳористон” маҳалласида яшовчи Карим Жумановнинг мурожаатига мувофиқ яроқсиз ҳолга келган ичимлик суви минораси ва 120 дан зиёд симёғоч янгиланадиган бўлди. Шунингдек, “Йўлдошобод” маҳалласида яшовчи Мақсуда Худойбердиеванинг уй-жойини таъмирлаш туман ҳокими ва 4-сектор раҳбари зиммасига юкланди.