Ўзбекистон Республикаси Президенти Администрацияси ишчи гуруҳи ва Сурхондарё вилоят суди раҳбарияти Денов, Шеробод туманлари ҳамда Термиз шаҳрида суд-ҳуқуқ масалаларига оид оммавий сайёр қабул ўтказди.

Икки кун давом этган очиқ мулоқотда фуқароларнинг юздан ортиқ мурожаати тингланиб, тегишли тартибда кўриб чиқилди. Уларнинг 25 таси жиноят иши, 70 га яқини фуқаролик иши ва ўндан ортиғи маъмурий ишга оид масалалар бўлиб, 37 таси жойида ҳал этилди. 63 та мурожаат юзасидан ҳуқуқий тушунтириш ва маслаҳат берилди.

Сайёр қабул доирасида тақдимнома ва илтимосномалар асосида озодликдан маҳрум қилиш, озодликни чеклаш ва ахлоқ тузатиш иши жазосини ўтаётган 114 нафар маҳкум жазони ўташдан муддатидан илгари шартли равишда озод этилди.  

–Жиноят ишлари бўйича Шеробод туман судида озодликдан маҳрум қилиш жазосини ўтаётган 13 нафар маҳкумнинг жазоси енгилроғи билан алмаштирилиб, манзил-колониядан озод этилди,¬ –дейди Сурхондарё вилоят суди  жамоатчилик ва оммавий ахборот воситалари билан алоқалар бўйича бош консультанти Асқар Қудратов.¬ Жиноят ишлари бўйича Термиз шаҳар судида 4 нафар озодликдан маҳрум қилиш жазосини ўтаётган маҳкумнинг сақлаш шароити ўзгартирилиб, умумий тартибли колониядан манзил колониясига ўтказилди. 5 нафар шахсга оид айблов хулосаси бўлган жиноят иши Жиноят кодексининг 661-моддасига асосан ярашув асосида кўрилиб, ҳаракатдан тугатилди. 4 нафар судланувчига оид жиноят иши судлар томонидан очиқ суд мажлисида кўрилиб, уларга қўлланилган қамоқ эҳтиёт чораси бекор қилинди ва суд залида қамоқдан озод этилди.

Қабул жараёнларида мурожаатлари ижобий ҳал этилган фуқаролар давлатимиз ва одил судловга миннатдорлик билдирди.